मोरङको बेलबारी नगरपालिकाले बाख्रा किन्ने ठेक्का पाएको ग्रो अर्गानिक कृषि प्रालि सङ्खुवासभासँगको गोप्य रूपमा ‘डिनर मिटिङ’ गरेको बिल तिरेको छ । फुल ब्लड बोयर भन्दै क्रस बोयर बाख्रा खरिद गरी अनियमितता प्रकरणमा मुछिएको बेलबारी नगरपालिकाले असार ८ गते दोलखाको मिराकल भ्यु रिसोर्ट प्रालिलाई नगरपालिकाको टोली र ठेकेदार प्रतिनिधिबीच भएको ‘डिनर मिटिङ’को बिल भुक्तान गरेको हो ।
नगरपालिकाका प्रमुख प्रशासकीय अधिकृत प्रदीप साहका अनुसार बिल आएको चार दिनभित्रै बैङ्क अकाउन्टमा उक्त रकम दाखिला गरिएको हो । मिटिङमा उठेको बिल ७० हजार ६० रुपैयाँ तिरिएको अधिकृत साहले केटिएम दैनिकसँग भने । ‘असार ४ गते बिल आएको थियो’, उनले भने, ‘वास्तवमा यो बिल ठेकेदार कम्पनीले तिर्ने शर्त थियो तर हामीले धरौटी रकम जफत गरेपछि हामीलाई फसाउन बिल सार्वजनिक गरिएको रहेछ । त्यसैले हाम्रो नीति तथा कार्यक्रमअन्तर्गत गरिएको भ्रमणबाट यो रकम तिरेका हौँ ।’
गत चैत १६ गते नगरपालिकाले विद्युतीय खरिद प्रणालीअनुसार सूचना जारी अस्ट्रेलियन बोयर जातको बाख्रा खरिद गर्न टेन्डर आह्वान गरेको थियो । जसमा सङ्खुवासभाको ग्रो अर्गानिक कृषि फर्मले बिड गरेको थियो । त्यसको केही दिनपछि नगरप्रमुख ज्ञानेन्द्र सुवेदीसहित २० जनाको टिम भ्रमणमा दोलखाको मिराकल होटल पुगेको थियो । तर टेन्डर बिड गर्ने ग्रो अर्गानिकका प्रतिनिधि श्याम पाण्डेसहितको टोली जनप्रतिनिधिलाई पछ्याउँदै उक्त होटल पुगेको थियो ।
सात दिनका लागि भनेर दोलखा पुगेको भ्रमण टोलीले त्यहाँ १० दिन बिताएको थियो । तथापि, त्यसदिनको खर्च भने ठेकेदार प्रतिनिधिले तिर्नेमा जनप्रतिनिधि विश्वस्त थिए । तर अनियमित खरिद प्रकरण मिडियामा सार्वजनिक भएपछि ठेकदारले बिल नतिरेर नगरपालिकालाई फसाउन खोजिएको साहको भनाइ छ ।
साहले भने, ‘यो भेट नियोजित थिएन । बरू उहाँहरूलाई हामीलाई पछ्याउँदै त्यहाँ पुग्नु भएको थियो । पछि टेन्डर उहाँहरूले नै पार्नु भयो । तर बाख्रा खरिद गर्दा हामीले भनेअनुसारको बाख्रा परेनन् ।’
होटलमा चैत २१ ठेकेदार प्रतिनिधि पाण्डेसँगको सो डिनर मिटिङमा नगरप्रमुख सुवेदी, अधिकृत साह, नगरपालिकाका तीन कर्मचारीसहित चक्रबहादुर खुलाल, घनश्याम गौतम, योगेन्द्रप्रसाद सुवेदी, उदयबहादुर राई, चेतबहादुर बस्नेत, नगेन्द्र खड्का र गङ्गाबहादुर याख्खा गरी सात जना वडाध्यक्ष सहभागी थिए ।
असार ४ गते होटलबाट बिलसहितको ताकेता–पत्र आएपछि नगरपालिकाले चुपचाप बिल तिरेको हो । ‘आधिकारिक पत्र हात परेपछि रकम तिरेका हौँ’, उनले भने, ‘पत्र सुरुमा नगरपालिकाको हात नलागेर उहाँहरूबाटै बाहिरिएको हो ।’ नगरपालिकाले ६ लाख २० हजार धरौटी रकम जफत गरेको, ठेक्का रद्द गरेको र भुक्तानी नदिएका कारण ठेकेदार कम्पनीले बिल सार्वजनिक गरेको उनको दाबी छ ।
बेलबारी नगरपालिकाले गत जेठ १५ गते अस्ट्रेलियाको सक्कली बोयर भन्दै पश्चिम नेपालबाट आयात गरिएका क्रस जातका ८९ वटा बाख्रा विभिन्न कृषक समूह तथा व्यावसायिक फर्महरूलाई वितरण गरेको थियो । अस्ट्रेलियाबाट चार्टर गरी ल्याइएको दाबी गर्दै कृषक समूह तथा ब्यवसायिक फर्महरूलाई बोयर जातका बाख्राका पाठा–पाठी वितरण गरिएको थियो ।
बाख्रा खरिदको ठेक्का पाएको सङ्खुवासभाको ग्रो अर्गानिक कृषि फर्मले अस्ट्रेलियन भनेर नवलरासीका किसानबाट बाख्रा सङ्कलन गरेर बाख्रा ल्याएको खुलेपछि थियो । फुल ब्लड बोयर भनी क्रस बोयर बाख्रा रहेको पाइएपछि भुक्तानी रोकिएको छ ।
बाख्रा खरिद प्रकरणमा करिब एक करोड रुपैयाँ अनियमितता भएको आशङ्का छ । नगरपालिकाले वितरण गरेको बाख्रामध्ये एउटा मरेको र अर्को एउटा किसानले काटेर खाएको स्रोतले जनाएको छ ।
केटिएम दैनिकमा बेलबारी बाख्रा प्रकरणसँग सम्वन्धित समाचारहरु
बेलबारी बाख्रा प्रकरण : नगरपालिकाद्वारा सम्झौता खारेज, ठेक्का पाउने कम्पनी कालोसूचीमा
बोका लिएरै आन्दोलनमा उत्रिए बेलबारीका युवा
एक करोड एक लाखको चलखेल भएको भन्दै मेयर सुवेदीविरुद्ध अख्तियारमा उजुरी
बेलबारीमा बोयर बाख्रा खरिदमा करोड रुपैयाँको चलखेल !
नगरपालिकाको चरम अनियमितता : नवलपरासीबाट ल्याइएको बाख्रा अस्ट्रेलियन भन्दै बाँडियो
कोरोना महामारीयता पशु आयातमा रोक लगाइँदा कसरी ल्याइयो अस्ट्रेलियाबाट बाख्रा ?
बेलबारी नगरपालिकाको ‘बाख्रा काण्ड’, अस्ट्रेलियाबाट ल्याइएको भनिएको बाख्रा बागलुङबाट !
बेलबारी नगरपालिकाले बाँड्यो अस्ट्रेलियाबाट ल्याएको बोयर जातको बाख्रा