कास्की । आफूलाई प्रहरी बताउँदै सर्वसाधरणलाई धाक धम्की दिने दुई व्यक्तिलाई कास्की प्रहरीले नियन्त्रणमा लिएको छ । बिहीबार बिहान २:३० बजेको समयमा पोखराको लेकसाइडबाट उनीहरू पक्राउ परेका हुन् ।
मादक पदार्थ सेवन गरेर हो-हल्ला गर्दै “हामीहरू प्रहरीको ठुलै व्यक्ति हौ” भनी रेडियो सेट (वाकिटाकी) समेत देखाई डर त्रास देखाई धम्की दिँदै हिडेको सूचनाको आधारमा वडा प्रहरी कार्यालय बैदामबाट खटिएको प्रहरी टोलीले उनीहरूलाई नियन्त्रणमा लिएको हो ।
पक्राउ पर्नेमा पोखरा महानगर-६ शान्तिनगर चोक बस्ने बर्ष ३२ को नारायण गिरी र सप्तरी डाक्लेश्वरी नगरपालिका-७ घर भई हाल पोखरामै बस्ने बर्ष २१ को बिबेक ठाकुर रहेका छन् ।
प्रहरीले नियन्त्रणमा लिएर सम्झाई बुझाई गर्ने क्रममा उनीहरूले डिउटीमा खटिएका प्रहरीमाथि अपशब्द बोल्दै गाली गलौज गरी अभद्र ब्यबहार गरेका थिए ।
पक्राउ परेका दुवैजनाउपर अभद्र ब्यबहार सम्बन्धी मुद्दामा जिल्ला प्रशासन कर्यालय कास्कीबाट दिन १० को म्यादथप गरी अनुसन्धान प्रकृया अगाडी बढाईएको प्रहरी निरीक्षक सुर्य बहादुर रानाले बताए ।