मोरङको बेलबारी नगरपालिकाका प्रमुख ज्ञानेन्द्र सुवेदीसहित पाँच जनाविरुद्ध अख्तियार दुरुपयोग अनुसन्धान आयोगमा उजुरी परेको छ । बोयर जातको बाख्रा किन्दा एक करोड रुपैयाँ चलखेल भएको दाबीसहित बेलबारीका ६ जना युवाहरूले आइतबार अख्तियारको इटहरी कार्यालयमा उजुरी दिएका हुन् ।
अष्ट्रेलियाबाट ल्याएको फुल ब्लड अस्ट्रेलियन बोयर बाख्रा भन्दै नगरपालिकाले किसानलाई बोकापाठी वितरण गर्दा अनियमितता भएको भन्दै उनीहरूले नगरप्रमुख सुवेदी, प्रमुख प्रशासकीय अधिकृत प्रदीप साह, बेलबारी १ का उत्तम गिरी, ग्रो अर्गानिक कृषि फर्मका प्रतिनिधि भनिएका श्याम पाण्डे र सुदीप चौधरी तथा बेलबारी नगरपालिकाका अन्य जनप्रतिनिधिको समेत संलग्नतामा एक करोड एक लाख रुपैयाँ बराबरको घोटाला भएको भन्दै छानबिन गरी आवश्यक कारवाहीका लागि उजुरी दिएका हुन् ।
नगरपालिकाकाले अस्ट्रेलियाबाट ल्याएको भन्दै वितरण गरेको बोयर जातको बाख्रा खरिदमा एक करोड एक लाख रुपैयाँको चलखेल भएको उनीहरूको दाबी छ ।
बेलबारीका युवाहरू विपीन आचार्य, सुजित बस्नेत, खेमप्रसाद गौतम, कमल सुब्बा, रिक्त बहादुर गुरुङ, विशाल थापाले अख्तियारमा उजुरी दिएका हुन् । उल्लेखित सबै विषयमा छानबिन गरी अनियमितताबारे सत्यतथ्य पत्ता लगाई कसुरदार उपर कानुनी कारवाही गर्न माग गर्दै उनीहरूले उजुरी दिएका हुन् ।
उजुरीमा अस्ट्रेलियाबाट ल्याइएको भन्दै नवलपरासीको केशर एग्रो फर्मबाट २३ लाख रुपैयाँमा गुणस्तरहित बोकापाठी ल्याइ वितरण गरेर एक करोड एक लाख रुपैयाँ घोटाला गरिएको उल्लेख छ । निवेदकमध्येका एक विपीन आचार्यले करोडौँको रकम अनियमितता हुनेगरीका घोटाला काण्डहरू हुँदा पनि बेलबारीका राजनितिक दल र सरोकारवालाहरूले यसबारे चासो नदिँदा भष्टाचार छोपिएर जानसक्ने भएकाले आफूहरूले उजुरी दिएको बताए ।
भष्टाचारजन्य घटनाहरूका विषयमा आफूहरू चुप लागेर नबस्ने र यस्ता काण्डहरूको भण्डाफोर गर्न कानुनी बाटो तथा चरणबद्ध आन्दोलनका कार्यक्रमहरू पनि अघि सारिने उनको भनाइ छ ।
अख्तियारले भन्यो : छानबिन सुरु भइसक्यो
अख्तियार दुरुपयोग अनुसन्धान कार्यालय इटहरीका प्रमुख बाबुराम खतिवडाले छानबिन प्रक्रिया सुरु भएको बाए । ‘बेलबारी नगरप्रमुख सुवेदीसहित पाँच जनाविरुद्ध उजुरी आएको छ,’ केटिएम दैनिकसँग उनले भने, ‘यस विषयमा छानबिन सुरु गरिसकेको छ । अख्तियारले आवश्यक प्रक्रियाहरू अगाडि बढाइसकेको छ । चाँडै नै सत्यतथ्य पत्ता लगाउछौँ ।’
जेठ १५ गते नगरपालिकाले अस्ट्रेलियाबाट चार्टर गरी ल्याइएको दाबी गर्दै कृषक समूह तथा ब्यवसायिक फर्महरूलाई बोयर जातका बाख्राका पाठा–पाठी वितरण गरेको थियो । बेलबारीका ११ वटै वडामा ५२ वटा बोयर जातको बोका तथा ३८ वटा पाठी वितरण गरिएको थियो । नगर प्रमुखसुवेदी स्वयमले एक करोड २५ लाख मूल्य खर्च गरेर ल्याइएको भन्दै किसानहरूलाई छिटो र बढी आर्थिक लाभ दिने भएकोले अस्ट्रेलियाबाट ल्याइएको बताएका थिए ।
तर बाख्रा खरिदको ठेक्का पाएको सङ्खुवासभाको ग्रो अर्गानिक कृषि फर्मले अस्ट्रेलियन भनेर नवलरासीका किसानबाट बाख्रा सङ्कलन गरेर बाख्रा ल्याएको पुष्टि भइसकेको छ । गत सोमबार बसेको कम्पनीका प्रतिनिधि र नगरपालिकाका पदाधिकारीबीचको बैठकले बाख्रा खरिदमा अनियमितता भएको आशङ्का गरेर छानबिन समिति गठन गरेको थियो ।
उपप्रमुख ढाकाकुमारी पराजुलीको नेतृत्वमा समित गठन गरिएपनि उपप्रमुख पराजुलीले आफ्नो स्वास्थ्यवस्थाको कारण देखाउँदै समितिमा बस्न नमानेका कारण यसले झन् शङ्का उब्जाएको छ ।
बाख्रा काण्ड सम्वन्धि केटिएम दैनिकमा प्रकाशित भएका समाचारहरु
बेलबारीमा बोयर बाख्रा खरिदमा करोड रुपैयाँको चलखेल !
नगरपालिकाको चरम अनियमितता : नवलपरासीबाट ल्याइएको बाख्रा अस्ट्रेलियन भन्दै बाँडियो
कोरोना महामारीयता पशु आयातमा रोक लगाइँदा कसरी ल्याइयो अस्ट्रेलियाबाट बाख्रा ?
बेलबारी नगरपालिकाको ‘बाख्रा काण्ड’, अस्ट्रेलियाबाट ल्याइएको भनिएको बाख्रा बागलुङबाट !
बेलबारी नगरपालिकाले बाँड्यो अस्ट्रेलियाबाट ल्याएको बोयर जातको बाख्रा