मोरङको बेलबारी नगरपालिकाले अस्ट्रेलियाबाट ल्याएर किसानहरूलाई बोयर जातको बाख्रा वितरण गरेको छ । कोरोनाको महामारीकबीच नगरपालिकाले कृषक समूह तथा ब्यवसायिक फर्महरूलाई बाख्राका पाठा–पाठी वितरण बितरण गरेको हो ।
नगरपालिकाले ५२ वटा बोयर जातको बोका तथा ३८ वटा पाठी वितरण गरिएको नगर प्रमुख ज्ञानेन्द्र सुवेदीले बताए । एक करोड २५ लाख मूल्य खर्च गरेर नगरपालिकाले अस्ट्रेलियाबाट बोका ल्याएर वितरण गरेको हो ।
किसानहरुलाई छिटो र बढी आर्थिक लाभ दिने भएकोले अष्ट्रेलियाबाट ल्याएर पाठा–पाठी विरतण गरिएको नगरप्रमुख सुवेदीले बताए । बेलबारीलाई बोयर बाख्राको पकेट क्षेत्रका रूपमा विकास गर्ने लक्ष्य लिएको उनले बताए ।
समूह तथा फर्महरूलाई शर्त नै राखेर वितरण गरिएको छ । अनुदानमा दिएका बाख्राहरू बिक्री गर्न नपाउने शर्त राखेर वितरण गरिएको प्रमुख प्रशासकीय अधिकृत प्रदीप साहले बताए । सोही बाख्राका पाठा–पाठीबाट उत्पादन बढाउने लक्ष्य लिएको उनले बताए । नगरपालिकाले बोयर जातका बाख्राका पाठा अनुदानमा दिनका लागि कार्यविधिनै बनाएको थियो ।
यो जातको बाख्राले दाना, पानी र स्थानीय स्तरमा पाईने सबै घाँस खाने भएकाले यतिबेला कृषकहरुको ध्यान उक्त बाख्रापालनमा गएको छ । थोरै समयमा धेरै नाफा दिने भएपछि कृषकहरुमा समेत बोयर प्रतिकोमोह बढिरहेको छ । अन्य जातको बाख्राभन्दा बोयरले छिटो सयमा फाइदा दिने पशुप्राविधिकहरू बताउँछन् ।
बाख्राका पाठा¬–पाठी पाएपछि कृषकहरूसमेत खुसी भएका छन् । बेलबारीमा ब्यवसायिक बाख्रा पालन गर्दैआएका किसान राजन गोर्खालीले बोयर जातको बाख्राबाट आय–आर्जनमा ठूलो राहत मिल्ने बताए ।
अष्ट्रेलियालाई बोयरको प्रजनन केन्द्रका रूपमा मान्ने गरिन्छ । माछा, दूध तथा अन्डामा आत्मनिर्भर भइसकेको नगरपालिकाले मासुमा समेत आत्मनिर्भर बनाउने जनाएको छ । निशेधाज्ञाको सयमा भिडभाड बढ्ने भएपछि नगरपालिकाले समूह तथा फर्ममा लगेर नै पाठा–पाठी छोडिदिएको छ ।