मोरङको बेलबारी नगरपालिकाले अस्ट्रेलियाबाट ल्याएर वितरण गरिएको बोयर जातको बाख्रा बागलुङबाट ल्याइएको दाबी गरिएको छ । शनिबार नगरका किसानलाई वितरण गरिएको उक्त बाख्राहरू अस्ट्रेलियाबाट नभई बागलुङ, धादिङ तथा पोखराबाट ल्याइएको भन्दै स्थानीय आक्रोशित भएका छन् ।
शनिबार नगरपालिकाले कृषक समूह तथा ब्यवसायिक फर्महरूलाई बाख्राका पाठा–पाठी वितरण वितरण गरेको हो । नगर प्रमुख ज्ञानेन्द्र सुवेदीले एक करोड २५ लाख मूल्य खर्च गरेर नगरपालिकाले अस्ट्रेलियाबाट बोका ल्याएको दाबी गरेका छन् ।
उनका अनुसार नगरपालिकाले ५२ वटा बोयर जातको बोका तथा ३८ वटा पाठी वितरण गरेको हो । किसानहरूलाई छिटो र बढी आर्थिक लाभ दिने भएकोले अस्ट्रेलियाबाट ल्याएर पाठा–पाठी विरतण गरिएको नगरप्रमुख सुवेदीको भनाइ छ ।
यस्तै, प्रमुख प्रशासकीय अधिकृत प्रदीप साहले अनुदानमा दिएका बाख्राहरू बिक्री गर्न नपाउने शर्त राखेर वितरण गरिएको बताए । नगरपालिकाले बोयर जातका बाख्राका पाठा अनुदानमा दिनका लागि कार्यविधिनै बनाएको थियो । सोही कार्यविधिअनुसार बाख्रा खरिद गरेर निषेधाज्ञाको सयमा नगरपालिकाले समूह तथा फर्ममा लगेर नै पाठा–पाठी छोडिदिएको थियो । अस्ट्रेलियालाई बोयरको प्रजनन केन्द्रका रूपमा मान्ने गरिन्छ ।
तर, स्थानीयले भने नगरलाई बोयर बाख्राको पकेट क्षेत्रका रूपमा विकास गर्ने लक्ष्य लिएर वितरण गरिएको उक्त बोयर जातका बाख्रा अस्ट्रेलियाबाट नभई नेपालकै उत्पादन भएको बताएका छन् । स्थानीय मान विष्टले नेपालकै धादिङ, बागलुङ र पोखराबाट ल्याइएको बताउँदै नगरपालिकाले आफन्तलाई मात्र वितरण गरेको आरोप लगाए ।
उनीमात्र होइन बेलबारी नगरक्षेत्रका मानिसले बोयर जातका बाख्रा सक्कली नभएको, आसेपासे, नातागोता, आफन्तलाई वितरण गरिएको र आर्थिक चलखेल भएको भन्दै आलोचना गरिरहेका छन् ।
यता, बेलबारी नगरपालिकाकी उपमेयर ढाकाकुमारी पराजुली आफू यो विषयमा अनभिज्ञ रहेको बताउँदै बिनासल्लाह यस्तो काम भएकोमा आपत्ति जनाउँछिन् । उनले आफ्नै घरअगाडिबाट ट्रकमा बाख्रा राखेर दौडिएको देख्दा खोजी गर्ने क्रममा मात्र बाख्रा बितरण भएको थाह पाएको बताइन् ।
उनले तत्काल अनुगमन गरी खरिद प्रक्रिया गलत भएमा र बोयर जातको बाख्रा नभएको पाइएमा भुक्तानी रोक्नेसमेत बताइन् । उनले एकतर्फी र मनोमानी गरिएको निर्णय आफूलाई स्वीकार नहुने बताइन् ।
