काठमाडौं । साविक विजेता लुम्बिनी लायन्स नेपाल प्रिमियर लिग (एनपीएल) को तेस्रो संस्करणमा प्लेअफमा पुग्ने पहिलो टोली बनेको छ ।
बिहीबार कीर्तिपुरस्थित त्रिवि क्रिकेट मैदानमा भएको खेलमा कर्णाली याक्सलाई ४ विकेटले पराजित गर्दै लुम्बिनीले एक खेल अगावै प्लेअफमा स्थान सुरक्षित गरेको हो ।
कर्णालीले दिएको १०६ रनको सामान्य लक्ष्य लुम्बिनीले १६.४ ओभरमा ६ विकेट गुमाएर पूरा गर्यो । जितसँगै ६ खेलबाट ९ अंक जोडेको लुम्बिनी अंकतालिकाको शीर्ष स्थानमा उक्लिएको छ । लिग चरणको आफ्नो अन्तिम खेलमा लुम्बिनीले विराटनगर किंग्ससँग प्रतिस्पर्धा गर्नेछ ।
लुम्बिनीको जितमा डार्शी सर्टले सर्वाधिक ४६ रन बनाए । उनले ३४ बलमा ६ चौका र एक छक्का प्रहार गरे । अर्धशतक बनाउन चार रनले चुकेका सर्ट १४औँ ओभरमा आउट भएका थिए ।
त्यस्तै दिलिप नाथले अविजित २८ रनको योगदान दिए । उनले २७ बलमा चार चौका प्रहार गरे । निरोशन डिकवेलाले १६ र शमिम हुसेनले पाँच रन बनाए ।
लुम्बिनीले सुरुवातमै विकेट गुमाएको थियो । आसिफ पौडेल, कप्तान रोहित पौडेल र सन्दीप जोराले क्रमशः एक, एक र चार रन मात्रै बनाउन सके । टोलीले १९ रनमै तीन विकेट गुमाएपछि डार्शी सर्ट र निरोशन डिकवेलाले चौथो विकेटका लागि ४१ रनको साझेदारी गर्दै इनिङ्स सम्हालेका थिए ।
बलिङतर्फ कर्णालीका मार्क वाटले उत्कृष्ट प्रदर्शन गर्दै चार ओभरमा एक मेडनसहित १२ रन खर्चेर चार विकेट लिए । पवन सर्राफ र हुसेन तलतले एक–एक विकेट हात पारे ।
त्यसअघि टस जितेर पहिले ब्याटिङ गरेको कर्णाली १९.२ ओभरमा १०५ रनमा अलआउट भएको थियो ।
कर्णालीका लागि सोमपाल कामीले सर्वाधिक २८ रन बनाए । उनले १८ बलमा चार चौका र एक छक्का प्रहार गरे । हुसेन तलतले २४ तथा गुल्सन झाले १३ रन जोडे । पवन सर्राफले १२ रन बनाए ।
अन्य ब्याटरले दोहोरो अंकमा रन बनाउन सकेनन् । यस सिजन पहिलो खेल खेलेका ओपनर दीपेन्द्र रावत खाता नखोली आउट भए । अरिफुल इस्लाम र दीपक डुम्रेले समान चार, कप्तान डेविड मिलरले पाँच, मार्क वाटले दुई र नन्दन यादवले तीन रन बनाए ।
१५ रनमै चार विकेट गुमाएको कर्णालीका लागि पवन सर्राफ र सोमपाल कामीले पाँचौँ विकेटका लागि ४० रनको साझेदारी गरेका थिए । तर, नियमित अन्तरालमा विकेट गुमाउँदा टोली ठूलो योगफल बनाउन असफल भयो ।
लुम्बिनीका अभिशेष गौतम, डार्शी सर्ट, किशोर महतो र कप्तान रोहित पौडेलले समान दुई विकेट लिए । रुबेन ट्रम्पलम्यान र शेर मल्लले एक–एक विकेट हात पारे ।
लगातार चौथो हार बेहोरेपछि कर्णालीको प्लेअफ यात्रा कठिन बनेको छ । सुरुवाती दुई खेल जितेको कर्णाली त्यसपछि लगातार चार खेलमा पराजित भएको हो । ६ खेलबाट चार अंक जोडेको कर्णाली अंकतालिकाको सातौँ स्थानमा छ ।
