काठमाडौं । युरोपका विभिन्न आठ देशमा एक साताभित्र दोस्रो पटक विमान र विमानस्थललाई लक्षित गरी बम विस्फोटको झुटो धम्की दिइएको छ। कम्तीमा २१ वटा विमान र विभिन्न विमानस्थलमा धम्की आएपछि युरोपको हवाई सेवा प्रभावित भएको छ।
धम्कीका कारण अस्ट्रिया, बेल्जियम, बुल्गेरिया, चेक गणतन्त्र, फ्रान्स, इटाली, पोल्यान्ड र रोमानियाका उडान प्रभावित भएका छन्। बेलायत सरकारले घटनालाई ‘दुर्भावनापूर्ण झुटो धम्की’ भन्दै गम्भीरतापूर्वक लिएको जनाएको छ।
डब्लिनबाट इटालीको रोम जाँदै गरेको एर लिङ्गसको विमानलाई सावधानीस्वरूप फ्रान्सस्थित एक सैन्य हवाई आधारमा अवतरण गराइएको थियो। त्यस्तै, हेलसिन्कीबाट रोम गइरहेको फिनएयरको विमानलाई इटालीका लडाकु विमानले सुरक्षा निगरानी दिएका थिए।
इजिजेटका अनुसार न्युक्यासल र ग्लास्गोबाट चेक गणतन्त्रको प्राग पुगेका उसका विमानलाई प्रहरीले सावधानीस्वरूप नियन्त्रणमा लिएको थियो। लन्डनको हिथ्रो र बर्मिङ्घम विमानस्थलमा समेत बम विस्फोटको धम्की प्राप्त भएको थियो। यद्यपि, प्रारम्भिक अनुसन्धानमा ती धम्की विश्वसनीय नरहेको मूल्याङ्कन गरिएको थियो।
विमान र विमानस्थलमा गरिएको सुरक्षा जाँचका क्रममा अहिलेसम्म कुनै विस्फोटक पदार्थ फेला परेको छैन। केही धम्कीको जिम्मेवारी अज्ञात समूहले लिएको दाबी गरे पनि घटनाहरूबीच आपसी सम्बन्ध रहे–नरहेको पुष्टि हुन सकेको छैन।
इटालीको राजधानी रोमका दुई विमानस्थलमा बिहीबार इमेलमार्फत बम विस्फोटको धम्की आएको विमानस्थल सञ्चालक निकाय एरोपोर्टी दी रोमाले जनाएको छ। ती इमेलमा आफूलाई ‘फाइटर्स अफ द मेल स्टेट’ भन्ने समूहका रूपमा परिचित गराइएको थियो।
उक्त समूहले आफूहरू ‘नारीवादी शासन व्यवस्था’ लाई निशाना बनाइरहेको दाबी गर्दै विस्फोट गराएर इतिहासमा आफ्नो छाप छाड्ने चेतावनी दिएको थियो। इमेलमा ‘आकाशलाई रातो बनाइदिने’ भन्दै धम्की दिइएको थियो।
इटालीका सञ्चारमाध्यममा सार्वजनिक भएका विवरणलाई रोमका दुवै विमानस्थल सञ्चालन गर्ने निकायले बीबीसीसँग पुष्टि गरेको छ।
‘फाइटर्स अफ द मेल स्टेट’ नामले सन् २०२१ मा मस्कोको अदालतबाट प्रतिबन्धित रुसी अतिवादी दक्षिणपन्थी समूह ‘मुज्स्कोई लिजन’ अर्थात् ‘मेल लिजन’ लाई संकेत गरेको हुन सक्ने अनुमान गरिएको छ। उक्त समूहले युक्रेनमाथि रुसको आक्रमणलाई समर्थन गर्दै आएको थियो।
तर, इमेल वास्तविक भए पनि धम्की दिने व्यक्ति वा समूहको पहिचान गर्न पर्याप्त आधार नहुने अधिकारीहरूको आकलन छ।
बेलायतकी यातायातमन्त्री हेइडी अलेक्जेन्डरले बिहीबारका घटनालाई ‘दुर्भावनापूर्ण झुटा धम्की’ भन्दै सरकारले गम्भीरतापूर्वक लिएको बताइन्। यस्ता घटनाको सामना गर्न आवश्यक सुरक्षा प्रक्रिया र संयन्त्र रहेको उनको भनाइ छ।
बेलायत सरकारका एक प्रवक्ताले बिहीबार बिहान प्राप्त धम्कीहरू समाधान गरिएको जानकारी दिए पनि घटनाबारे थप विवरण सार्वजनिक गरेनन्।
हिथ्रो विमानस्थलले पनि प्राप्त धम्कीलाई अविश्वसनीय ठहर गरिएको र यात्रु, कर्मचारी तथा विमानको सुरक्षामा कुनै जोखिम नरहेको जनाएको छ। बर्मिङ्घम विमानस्थलले भने धम्की प्राप्त हुनासाथ आपत्कालीन सेवा र सम्बन्धित निकायसँग समन्वय गरी सुरक्षा प्रक्रिया अघि बढाइएको जानकारी दिएको छ।
