काठमाडौँ । नेपाल प्रिमियर लिग (एनपीएल) को तेस्रो संस्करणअन्तर्गत शुक्रबार दुई खेल हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने पहिलो खेलमा कर्णाली याक्स र सुदूरपश्चिम रोयल्स भिड्दा दोस्रो खेलमा चितवन राइनोज र पोखरा एभेन्जर्स आमनेसामने हुनेछन् ।
शुक्रबारका दुवै खेल टोलीहरूको प्लेअफ यात्राका लागि महत्त्वपूर्ण मानिएका छन् । पहिलो खेलमा समान चार अंक जोड्दै आएका कर्णाली र सुदूरपश्चिमबीच प्रतिस्पर्धा हुनेछ । यद्यपि कर्णालीले सुदूरपश्चिमभन्दा एक खेल कम खेलेको छ ।
दिउँसो साढे १२ बजे सुरु हुने पहिलो खेलमा कर्णाली लगातार तेस्रो जितको खोजीमा हुनेछ भने सुदूरपश्चिम जित निकाल्दै अंकतालिकामा आफ्नो अवस्था सुधार्न चाहन्छ ।
कर्णालीले प्रतियोगिताको पहिलो खेलमा जनकपुर बोल्ट्सलाई १९ रनले पराजित गरेको थियो । दोस्रो खेलमा विराटनगर किङ्ग्सलाई चार विकेटले हराएको कर्णाली तेस्रो खेलमा भने काठमाडौँ गोर्खाजसँग चार विकेटले पराजित भएको थियो ।
काठमाडौँविरुद्ध पहिले ब्याटिङ गरेको कर्णालीले २० ओभरमा ६ विकेट गुमाएर १८० रन बनाएको थियो । तर काठमाडौँले १९.४ ओभरमा ६ विकेट गुमाएर लक्ष्य पूरा गरेपछि कर्णालीको लगातार जितको यात्रा रोकिएको थियो ।
तीन खेलबाट चार अंक जोडेको कर्णालीको नेट रनरेट प्लस ०.२९५ छ । टोलीका लागि कप्तान सोमपाल कामी, साहिबजादा फरहान र गुलशन झासहित अन्य ब्याटरको प्रदर्शन महत्त्वपूर्ण हुनेछ । यसै खेलबाट दक्षिण अफ्रिकी अनुभवी ब्याटर डेभिड मिलरले पनि एनपीएलमा डेब्यु गर्नेछन् ।
अर्कोतर्फ सुदूरपश्चिमले पहिलो खेलमा लुम्बिनी लायन्ससँग सात विकेटको हार बेहोरेको थियो । त्यसपछि पोखरा एभेन्जर्सलाई ६ विकेटले हराएको सुदूरपश्चिम विराटनगर किङ्ग्ससँग पाँच ओभरमा खेलाइएको प्रतिस्पर्धामा ३५ रनले पराजित भएको थियो । चौथो खेलमा भने चितवन राइनोजलाई पाँच विकेटले हराउँदै टोलीले दोस्रो जित निकालेको थियो ।
चार खेलबाट चार अंक जोडेको सुदूरपश्चिमको नेट रनरेट माइनस १.०६४ छ । शुक्रबारको खेल जित्दै अंक थप्नुका साथै नेट रनरेट सुधार्ने लक्ष्यमा टोली हुनेछ । सुदूरपश्चिमका कप्तान दीपेन्द्रसिंह ऐरी, सैफ जैब, ब्रान्डन म्याकमुलन, स्कट कुगेलाइन र शेरफेन रदरफोर्ड मुख्य खेलाडीका रूपमा रहनेछन् ।
एनपीएलका अघिल्ला दुई संस्करणमा कर्णाली र सुदूरपश्चिम दुई पटक आमनेसामने भएका थिए । दुवै खेलमा सुदूरपश्चिम विजयी भएको थियो । पहिलो संस्करणमा कर्णालीले दिएको १०२ रनको लक्ष्य सुदूरपश्चिमले १५.२ ओभरमा चार विकेट गुमाएर पूरा गरेको थियो ।
दोस्रो संस्करणमा सुदूरपश्चिमले २० ओभरमा नौ विकेट गुमाएर १३९ रन बनाएको थियो । जवाफी ब्याटिङमा उत्रिएको कर्णाली १९.२ ओभरमा ९४ रनमै समेटिएपछि सुदूरपश्चिम ४५ रनले विजयी भएको थियो ।
चितवन र पोखराबीच दोस्रो खेल
शुक्रबारको दोस्रो खेलमा चितवन राइनोज र पोखरा एभेन्जर्स बेलुका साढे ४ बजे प्रतिस्पर्धामा उत्रनेछन् । एक खेल जितेको चितवन जितको लय फर्काउने प्रयासमा रहँदा लगातार तीन खेलमा पराजित पोखरा पहिलो जितको खोजीमा हुनेछ ।
चितवनले प्रतियोगिताको पहिलो खेलमा विराटनगर किङ्ग्सलाई आठ रनले पराजित गर्दै सुखद सुरुवात गरेको थियो । दोस्रो खेलमा लुम्बिनी लायन्ससँगको खेल वर्षाका कारण रद्द भएपछि दुवै टोलीले एक–एक अंक बाँडेका थिए । तर तेस्रो खेलमा सुदूरपश्चिमसँग पाँच विकेटले पराजित भएपछि चितवनको जितको यात्रा रोकिएको थियो ।
तीन खेलबाट एक जित, एक हार र एक खेलमा अंक बाँडेको चितवनले तीन अंक जोडेको छ । टोलीको नेट रनरेट माइनस ०.४८६ छ । चितवनका लागि कप्तान कुशल मल्ल, रञ्जित कुमार र सिकन्दर राजासहित अन्य खेलाडीको प्रदर्शन महत्त्वपूर्ण हुनेछ ।
पोखरा भने जारी प्रतियोगितामा जितविहीन छ । पहिलो खेलमा सुदूरपश्चिमसँग ६ विकेटले पराजित भएको पोखरा दोस्रो खेलमा जनकपुर बोल्ट्ससँग नौ रनले हारेको थियो । तेस्रो खेलमा लुम्बिनी लायन्ससँग आठ विकेटको हार बेहोरेपछि पोखरा लगातार तीन खेलमा पराजित भएको छ ।
तीन खेलबाट कुनै अंक जोड्न नसकेको पोखरा अंकतालिकाको पुछारमा छ । टोलीको नेट रनरेट माइनस १.७७० रहेको छ । त्यसैले शुक्रबारको खेल पोखराका लागि प्रतियोगितामा पुनरागमन गर्ने महत्त्वपूर्ण अवसर हुनेछ ।
पोखराका कप्तान कुशल भुर्तेल, चमिका करुणारत्ने र रवी बोपारालगायत खेलाडीमाथि टोलीको भरोसा रहनेछ । विशेषगरी ब्याटिङमा राम्रो सुरुवात गर्न नसक्नु पोखराको मुख्य चुनौतीका रूपमा देखिएको छ ।
एनपीएलका अघिल्ला दुई संस्करणमा चितवन र पोखराबीच दुई पटक प्रतिस्पर्धा भएको थियो । दुवै टोलीले एक–एक खेल जितेका छन् ।
पहिलो संस्करणमा चितवनले २० ओभरमा सात विकेट गुमाएर १६१ रन बनाएको थियो । जवाफमा पोखरा १३.२ ओभरमा ७४ रनमै समेटिएपछि चितवनले ८७ रनको फराकिलो जित निकालेको थियो ।
दोस्रो संस्करणमा भने पोखराले बदला लिँदै चितवनले दिएको १२१ रनको लक्ष्य १९.४ ओभरमा दुई विकेट गुमाएर पूरा गरेको थियो । उक्त खेलमा पोखरा आठ विकेटले विजयी भएको थियो ।
दुई टोलीबीचको आपसी प्रतिस्पर्धा बराबरी अवस्थामा रहेकाले शुक्रबारको खेल जित्ने टोलीले अग्रता लिनेछ । दुवै खेलको नतिजाले अंकतालिकाको समीकरण र प्लेअफ दौडलाई थप रोचक बनाउने अपेक्षा गरिएको छ ।
