काठमाडौं । नेपाली कांग्रेसको १५औँ महाधिवेशनअन्तर्गत प्रदेशसभा तथा प्रतिनिधिसभा क्षेत्रीय अधिवेशन मौसमको अनुकूलता हेरेर सञ्चालन गर्न केन्द्रीय निर्वाचन समितिले निर्देशन दिएको छ।
असोज १० गतेका लागि तय गरिएको क्षेत्रीय अधिवेशन मौसम अनुकूल रहेका क्षेत्रमा तोकिएकै मितिमा र प्रतिकूल अवस्था रहेका क्षेत्रमा सम्बन्धित जिल्ला तथा क्षेत्रका पार्टी कार्यसमितिसँग समन्वय गरी असोज १३ गतेभित्र सम्पन्न गर्न समितिले निर्देशन दिएको हो।
केन्द्रीय निर्वाचन समितिका सदस्य–सचिव राजु कटुवालले बिहीबार जारी गरेको प्रेस विज्ञप्तिमा विभिन्न स्थानमा भइरहेको भारी वर्षाका कारण अधिवेशन प्रक्रियामा कठिनाइ भइरहेको जानकारी निर्वाचन अधिकृतहरूबाट प्राप्त भएको उल्लेख छ। आगामी केही दिन वर्षा जारी रहने तथा मौसम विभागलगायत विभिन्न निकायले सतर्क रहन सूचना जारी गरेको अवस्थालाई समेत ध्यानमा राखी यस्तो व्यवस्था गरिएको समितिले जनाएको छ।
कांग्रेसको १५औँ महाधिवेशन असोज १६ देखि १९ गतेसम्म हुँदैछ। महाधिवेशनअन्तर्गत वडा अधिवेशन सम्पन्न भइसकेका छन् भने गाउँ–नगर अधिवेशन जारी छन्। हालसम्म ६६ जिल्लाका ६३० पालिकामा निर्वाचन सम्पन्न भएको समितिले जनाएको छ।
