काठमाडौं। नेपाली कम्युनिस्ट पार्टीका संयोजक पुष्पकमल दाहालले मुलुक सुगौली सन्धिपछिकै गम्भीर राष्ट्रिय स्वाधीनताको संकटमा रहेको बताएका छन्। यस्तो संकटबाट निकासका लागि कम्युनिस्ट शक्तिबीच एकता र सहकार्य आवश्यक रहेको उनको भनाइ छ।
आइतबार ‘कम्युनिस्ट आन्दोलनमा सहकार्य, एकता र पुनर्गठन’ विषयक अन्तरक्रियालाई सम्बोधन गर्दै दाहालले राष्ट्रिय स्वाधीनता, उत्पीडित वर्गका मुद्दा र वैदेशिक हस्तक्षेपविरुद्धको संघर्षलाई पर्याप्त प्राथमिकता दिन नसक्दा अहिलेको असाधारण परिस्थिति उत्पन्न भएको बताए।
“राष्ट्रिय स्वाधीनतामा सुगौली सन्धिपछि सायद यति भयानक संकट कहिल्यै देखिएको थिएन,” दाहालले भने।
विगतका कमजोरीका लागि राजनीतिक दलहरूले एक–अर्कालाई दोषारोपण गर्नुभन्दा सामूहिक रूपमा गम्भीर आत्मसमीक्षा गर्नुपर्ने उनले बताए। राष्ट्रिय स्वाधीनता र देशभक्तिपूर्ण आन्दोलनको कम्युनिस्ट आन्दोलनसँग ‘नङ र मासु’को सम्बन्ध रहेको उल्लेख गर्दै उनले साझा निकासका लागि विभिन्न कम्युनिस्ट शक्तिबीच सहकार्य र पुनर्गठन आवश्यक रहेको बताए।
“यो संकटबाट पार पाउन र जनताको विकास तथा समृद्धिको आकांक्षा सम्बोधन गर्न कम्युनिस्ट आन्दोलनको एकता नै मुख्य साँचो हो,” उनले भने।
राष्ट्रिय स्वाधीनताको रक्षा र सुदृढीकरणका लागि साझा दृष्टिकोण निर्माण गर्नुपर्नेमा जोड दिँदै दाहालले कार्यक्रममा सहभागी विभिन्न कम्युनिस्ट दल तथा समूहका प्रतिनिधिलाई सहकार्य र एकताका लागि अघि बढ्न आह्वान गरे।
