काठमाडौं– नेपाल प्रिमियर लिग (एनपीएल) को तेस्रो संस्करणमा पहिलोपटक डिसिजन रिभ्यू सिस्टम (डीआरएस) प्रविधि प्रयोग गरिने भएको छ।
नेपाल क्रिकेट संघ (क्यान) ले मंगलबार सामाजिक सञ्जालमार्फत प्रतियोगितामा डीआरएस प्रयोग गर्न लागिएको जानकारी दिएको हो। अन्तर्राष्ट्रिय क्रिकेट परिषद् (आईसीसी) को मान्यताप्राप्त नेपालको घरेलु क्रिकेट प्रतियोगिता एनपीएलले हरेक संस्करणमा सुविधा र प्रविधिमा सुधार गर्दै आएको छ।
क्यानका सचिव पारस खड्काले यसअघि नै एनपीएलमा डीआरएस भित्र्याउने तयारी भइरहेको बताएका थिए। उनका अनुसार यसका लागि दुई कम्पनीसँग प्रविधिको परीक्षणसमेत गरिएको थियो। परीक्षणबाट प्राप्त नतिजा र प्रविधिको शुद्धता मूल्यांकन गरेपछि डीआरएस लागू गर्ने निर्णय लिइएको हो।
डीआरएस क्रिकेटमा मैदानमा रहेका अम्पायरको निर्णय पुनरावलोकन गर्न प्रयोग गरिने प्रविधि हो। अम्पायरको निर्णयप्रति असन्तुष्टि भएमा खेलाडीले निर्धारित नियमअनुसार रिभ्यू माग गर्न सक्छन्। यसले गलत निर्णय सच्याउन सहयोग गर्नुका साथै खेललाई थप निष्पक्ष र प्रतिस्पर्धात्मक बनाउँछ।
क्यानका अनुसार एनपीएलमा एलबीडब्ल्यु (लेग बिफोर विकेट) सम्बन्धी निर्णय पुनरावलोकनका लागि फूल थ्रीडी बल ट्र्याकिङ प्रविधि प्रयोग गरिनेछ। यसका अतिरिक्त रनआउट, स्टम्पिङ र नो बलसम्बन्धी निर्णयमा पनि रिभ्यू लिन सकिने व्यवस्था हुनेछ।
त्यस्तै, कृत्रिम बुद्धिमत्ता (एआई) मा आधारित एज डिटेक्सन प्रविधिमार्फत बल ब्याटमा लागेको वा नलागेको पत्ता लगाइनेछ। यसले ब्याट र बलबीचको सम्पर्क पहिचान गरी निर्णय प्रक्रियालाई थप विश्वसनीय बनाउन सहयोग गर्नेछ।
प्रतियोगितामा बलको उचाइका आधारमा वाइडसम्बन्धी निर्णयको विश्लेषण, छक्काको दूरी र उचाइ मापन तथा बलिङसम्बन्धी विभिन्न तथ्यांक विश्लेषण गर्ने सुविधा पनि उपलब्ध हुने क्यानले जनाएको छ।
एनपीएलमा डीआरएसको प्रयोगले अम्पायरका निर्णयमा उत्पन्न हुने विवाद कम गर्नुका साथै खेल सञ्चालनलाई प्रविधिमैत्री बनाउने अपेक्षा गरिएको छ। यसले खेलाडी र दर्शकको विश्वास बढाउनुका साथै नेपाली क्रिकेटमा आधुनिक प्रविधिको प्रयोग विस्तार गर्नसमेत महत्त्वपूर्ण योगदान पुर्याउने विश्वास गरिएको छ।
