झापा। झापामा जापानिज इन्सेफ्लाइटिस (जेई) विरुद्ध ३० वर्षमाथिका पाँच लाखभन्दा बढी नागरिकलाई खोप लगाउने अभियान सोमबारदेखि सुरु भएको छ। असोज १५ गतेसम्म सञ्चालन हुने अभियानका लागि जिल्लाका १३१ वडामा ९ सय खोप केन्द्र स्थापना गरिएको छ।
स्वास्थ्य चौकी काँकरभिट्टामा कोशी प्रदेशका स्वास्थ्य राज्यमन्त्री उमाकान्त गौतमले खोप लगाएर अभियानको सुरुवात गरे। स्वास्थ्य कार्यालय झापाका प्रमुख वृजकुमार दासका अनुसार अभियानका लागि ५ लाख ७० हजार डोज खोप प्राप्त भएको छ।
अभियानमा करिब ५ सय स्वास्थ्यकर्मी, ६११ महिला स्वास्थ्य स्वयंसेविका र ३ हजारभन्दा बढी स्वयंसेवक परिचालन भएका छन्। जिल्लाका १५ वटै पालिकामा सञ्चालन हुने अभियानमा ३० वर्षमाथिका नागरिकलाई लक्षित गरिएको छ।
‘जेईको सङ्क्रमण र मृत्युदर बढ्दै गएपछि उच्च सतर्कता अपनाउँदै खोप अभियान सञ्चालन गर्न लागिएको हो,’ दासले बताए।
स्वास्थ्य कार्यालयका अनुसार झापामा हालसम्म १३ जनामा जेई संक्रमण पुष्टि हुँदा ७ जनाको मृत्यु भएको छ। संक्रमितमध्ये ६ जना ५० वर्षमाथिका र एक जना ८ वर्षीय बालक छन्। मृत्यु भएका कसैले पनि जेईविरुद्धको खोप नलगाएको पाइएको दासले बताए।
गर्भवती तथा तत्काल खोप लगाउन नमिल्ने अवस्थाका बिरामीबाहेक लक्षित समूहका सबैलाई खोप लगाउन आग्रह गरिएको छ।
