कांग्रेस उपसभापति तथा उद्योगी विनोद चौधरी भन्छन्-
‘राजनीति यस्तो प्लाटफर्म हो जहाँ एउटा सिग्नेचर सही मान्छेले सही ठाउँमा गर्यो भने देशको प्रत्येक जनतालाई छुन सक्छ ।’
चन्दा क्षेत्री/केटीएम दैनिक
राजनीतिक परिवर्तनको अध्याय लेखिसकेको नेपालले अब आर्थिक समृद्धिको यात्रा तय गर्नुपर्ने बताउँदै कांग्रेसका नवनिर्वाचित उपसभापति तथा नेपालका एकमात्र डलर अर्बपति विनोद चौधरीले आर्थिक रूपान्तरणका लागि आफ्नो सत्प्रयास रहने प्रतिबद्धता व्यक्त गरेका छन् ।
कांग्रेसको १५ औँ महाधिवेशनबाट उपसभापतिमा निर्वाचित भएपछि चौधरीले केटीएम दैनिकसँगको कुराकानीमा अब मुलुकलाई आर्थिक समृद्धिको लैजानका लागि पार्टीमार्फत भूमिका निर्वाह गर्ने बताएका छन् । नेपालमा विभिन्न समयमा भएका आन्दोलनबाट राजनीतिक परिवर्तन भएको र कांग्रेसमा पनि राजनीतिक परिवर्तन देखिएको उनको भनाइ थियो ।
पार्टी महाधिवेशनपछि नेतृत्व चयनका लागि भएको निर्वाचन परिणाम आएपछि उपसभापति चौधरीले पार्टी र मुलुकले लिनुपर्ने आगामी यात्राबारे आफ्नो धारणा राखेका हुन् । ‘विभिन्न ढंगबाट राजनीतिक रुपान्तरण भयो, अब आर्थिक रुपान्तरणको अत्यन्त महत्त्वपूर्ण एजेन्डालाई निर्णायक ठाउँमा पुर्याउने मेरो सत्प्रयास रहनेछ, इमानदार प्रयास रहनेछ,’ उपसभापति चौधरीले भने, ‘यो काममा वर्तमान कांग्रेस सभापति, वरिष्ठ उपसभापति लगायत सबैसँग मिलेर काम गर्नेछु ।’
नेपालका निजी क्षेत्रका अग्रणी संस्थाहरू नेपाल उद्योग वाणिज्य महासंघ (एफएनसीसीआई) र नेपाल उद्योग परिसंघ (सीएनआई)को माध्यमबाट मुलुकका लागि सक्दो काम गरेको चौधरीले बताए । मुलुकको आर्थिक उन्नतिका लागि निजी क्षेत्रका संस्थामा काम गरेको अनुभवसहित अगाडि बढेर राजनीतिक दलमा आबद्ध भएको उनले सुनाए । ‘एफएनसीसीआई र सीएनआईबाट मैले पुर्याउन सक्ने योगदानहरू सीमित थिए । यो राजनीतिको प्लाटफर्म भनेको यस्तो हुन्छ कि एउटा सिग्नेचर सही मान्छेले सही ठाउँमा गर्यो भने देशको प्रत्येक जनतालाई छुन सक्छ, सकरात्मक ढंगले,’ चौधरीले भने ।
नेपालमा पछिल्लो राजनीतिक परिवर्तन जेन-जी आन्दोलनमार्फत भएको चौधरीको भनाइ छ । उक्त आन्दोलनसँगै कांग्रेसको नेतृत्वमा पनि परिवर्तन आएको छ । २०८२ भदौ २३ र २४ मा भएको जेन-जी आन्दोलनपछि कांग्रेसका तत्कालीन महामन्त्रीद्वय गगन थापा र विश्वप्रकाश शर्माको अगुवाइमा विशेष महाधिवेशन भएको थियो । विशेष महाधिवेशन सम्पन्न गर्नका लागि थापा र शर्मालाई चौधरीले पूरापूर सहयोग गरेका थिए ।
जेन-जी आन्दोलनमार्फत मुलुकमा राजनीतिक परिवर्तन गर्ने पुस्ताले नेपालमा नै काम गर्ने वातावरण बन्नुपर्ने उपसभापति चौधरीको भनाइ छ । त्यो वातावरण बनाउने कार्यको नेतृत्व कांग्रेसले लिनुपर्ने पनि उनको धारणा छ । ‘नेपालमा ३५ वर्षभन्दा उमेरका भाइबहिनीहरूले ठूलो परिवर्तन ल्याए, क्रान्ति चलाए र देशभरीका परिवार जोडिन पुगे । ती सबैले खोजेको समुन्नत नेपाल हो,’ चौधरीले भने,. ‘ती आफैले रोजगारी पाउन सकोस्, आफूले गर्न चाहेको काम खुला ढंगले गर्न पाओस् ।‘
पार्टीमा राजनीतिक परिवर्तन गरेको, नेतृत्व परिवर्तन गरेको कांग्रेसले अब मुलुकमा व्यवसायिक वातावरण बनाउन भूमिका खेल्नुपर्ने बताए । त्यसका लागि प्रशासनिक रूपमा आउने झन्झटको अन्त्य गर्नुपर्ने उनको भनाइ छ । ‘कसैको पनि अनावश्यक दबाब, गलत अपेक्षाको शिकार बन्नु नपरोस् । रेड टेपिजम र ब्युरोक्रेसीको शिकार बन्नु नपरोस्,’ उनले भने, ‘सहज ढंगले सुझाव दिउन्, मान्छेले त्यो किसिमको नेपालको परिकल्पना मैले गरेँ । त्यसै कारणले मात्रै म राजनीतिमा सक्रीय रूपमा रहेको हो ।‘
कांग्रेसको १५ औँ महाधिवेशनमा पार्टीका सबै सदस्यले चुन्ने र चुनिने सन्दर्भमा समान अवसर पाएको बताए । महाधिवेशनमा सबै नेताहरू वडा तहबाट नै निर्वाचित भएर आउने समान व्यवस्था गरिएको स्पष्ट पार्दै प्रतिनिधिले केन्द्रीय समितिमा उपस्थिति जनाउन पनि समान प्रतिस्पर्धा गरेको बताए । ‘मेरो आफ्नो हकमा नयाँ जिम्मेवारी थपियो । पार्टीका कार्यकर्ता सबैले पत्याउनुभयो । सबै कार्यकर्ता क्षेत्रीय अधिवेशनबाट प्रतिनिधि निर्वाचित भएर आउनुभयो । सात हजारभन्दा बढी प्रतिनिधि रहेको कांग्रेसको इतिहासको सबैभन्दा ठूलो महाधिवेशन बन्यो,’ चौधरीले भने, ‘यो महाधिवेशनले कसैलाई पनि काखा र पाखा गर्ने स्थिति गरेजस्तो मलाई लाग्दैन ।‘
सात हजारभन्दा बढी महाधिवेशन प्रतिनिधि र पदाधिकारी र केन्द्रीय सदस्यका आठ सयभन्दा बढी उम्मेदवारबीच आफूलाई फरक रूपमा उभ्याउँदै पार्टीभित्र र बाहिर नयाँ सन्देश दिएको चौधरीको समीक्षा छ ।
पार्टीका आगामी चुनौतीबारे पनि उपसभापति चौधरीले आफ्ना धारणा राखेका छन् । पार्टीमा नयाँ नेतृत्व चयन भएपछि पार्टीभित्र र पार्टी बाहिर रहेका व्यक्तिहरूमा सकरात्मक सन्देश दिनुपर्ने बताए । ‘पार्टीभित्र र पार्टी बाहिर रहेका मानिसमा समेत नयाँ सन्देश कसरी दिने भन्ने नै अहिलेको चुनौती हो । अहिलेको हाम्रो अर्को चुनौती भनेको लगत्तै आउने स्थानीय तह निर्वाचन हो,’ चौधरीले भने ।
पार्टीको जिल्ला र प्रदेशको अधिवेशन पनि सफलतापूर्वक सम्पन्न गर्नुपर्ने कार्य अहिलेको केन्द्रीय समितिमा रहेको चौधरीले बताए । जिल्ला र प्रदेशका समितिमा पनि विभिन्न पेसा र व्यवसायमा रहेका व्यक्तिहरू तथा फरक-फरक क्लस्टरबाट सहभागी गराउने नीति कांग्रेसले लिएको उनले बताए । ‘पार्टीका जिल्ला र प्रदेश समितिमा पनि यस्तै पारदर्शी ढंगबाट जुनसुकै वर्ग, पेसाबाट आएका किन नहुन् योपालि पार्टीले ल्याटरल इन्ट्रीको माध्यमबाट सबैका लागि ढोका खोलेको छ । पहिला छेकेर, थुनेर केही सीमित मान्छेहरूको खल्तीबाट विभिन्न अपवाद होलान् । त्यो परिस्थितिबाट पार्टी मुक्त भएको छ,’ चौधरीले भने ।
त्यस्तै, पार्टीको उपसभापति निर्वाचित चौधरीले नेपालीहरूको महान चाड विजया दशमीको अवसरमा कांग्रेस पार्टीका नेता, कार्यकर्ता र शुभेच्छुकहरूलाई शुभकामना सन्देश दिए । उनले भने, ‘नेपाली कांग्रेसलाई निरन्तर माया गर्ने, नेपाली कांग्रेसलाई सम्झिने, कांग्रेसले बाटो बिराउँदाखेरि समेत यसलाई नछोड्ने सम्पूर्ण शुभेच्छुक, हितैसी र नेपाली कांग्रेसमै पुस्तौं पुस्तादेखि जोडिएर बसेका फरकफरक व्यक्तिहरू हाम्रो पार्टी सभापतिको भाषामा पाँच पुस्तालाई प्रतिनिधित्व गर्ने पार्टीका ती सबै नै हाम्रा आदरणीय मित्रहरू एवं नौ लाखभन्दा बढी क्रियाशील साथीहरू सबैमा विजया दशमीको हार्दिक शुभकामना ।‘ यो विजया दशमीले सबै नेपालीको घरमा सुख, शान्ति र सम्बृद्धिको कामना उपसभापति चौधरीको छ ।
