काठमाडौं– बडादशैंको मुख्य दिन बुधबार देशभरको मौसम मुख्यतया सफा रहने मौसम पूर्वानुमान महाशाखाले जनाएको छ। महाशाखाका अनुसार दिउँसो हिमाली र पहाडी भूभागमा आंशिक बदली हुने भए पनि तराई क्षेत्रमा मौसम सफा रहनेछ।
बुधबार हिमाली क्षेत्रका साथै कोशी र गण्डकी प्रदेशका पहाडी भूभागका एक–दुई स्थानमा हल्का वर्षा तथा हिमपातको सम्भावना रहेको छ। रातिको समयमा कोशी र गण्डकी प्रदेशका हिमाली तथा पहाडी क्षेत्रमा आंशिक बदली रहने र अन्य भूभागमा मौसम मुख्यतया सफा रहने पूर्वानुमान गरिएको छ।
महाशाखाका अनुसार तराईका केही स्थानमा बिहानको समयमा हुस्सु तथा कुहिरो लाग्न सक्नेछ।
त्यस्तै, दशैंको भोलिपल्ट बिहीबार दिउँसो पनि हिमाली र पहाडी भूभागमा आंशिक बदली रहने अनुमान छ। तराई क्षेत्रमा भने मौसम मुख्यतया सफा रहनेछ। बिहीबार हिमाली भूभागका एक–दुई स्थानमा हल्का वर्षा तथा हिमपातको सम्भावना रहेको महाशाखाले जनाएको छ।
