लुम्बिनी लायन्स, नेपाल प्रिमियर लिग (नपीएल) क्रिकेट प्रतियोगिताको पहिलो सिजनमा कमजोर प्रस्तुति भुलाउँदै दोस्रो सिजनको विजेता तेस्रो सिजनमा कस्तो तयारीमा छ ? भन्ने प्रश्न यो टोलीका प्रत्येक फ्यानहरूको मनमा छ।
एनपीएलको तेस्रो सिजन नजिकिँदै गर्दा टोलीका लगानीकर्ता, खेलाडी र फ्यानहरूलाई उत्सुक बनाइरहेको छ, यसपटक टीमहरूले कसरी तयारी गरिरहेका छन् ? यसै कौतुहलताका बीच एनपीएल दोस्रो सिजनको विजेता लुम्बिनी लायन्सका क्रिकेट टीमका अध्यक्ष ईश्वर जिसीसँग केटीएम दैनिकको ‘स्पोर्ट्स टक’मा चन्दा क्षेत्रीले गरेको संवाद:
एकातिर दसैंको माहोल छ भने अर्कोतिर एनपीएल सिजन ३ नजिकै आइसकेको छ, व्यस्तता कत्तिको छ ?
ठिकै छ। अहिले एनपीएल सिजन ३ को अन्तिम घडीमा छौँ । तयारीको अन्तिम घडीमा भएको कारण र दसैं मनाउने भएकाले कार्यव्यस्तता बढी नै छ ।
यसपटक एनपीएलको समय अप्ठ्यारो समयमा पर्यो भनेर प्रश्न उठिरहेका छन् । यसबारे तपाई के भन्नुहुन्छ ?
मलाई चाहिँ एकदमै सही समय हो जस्तो लाग्छ। किनकि हामीले दसैं तिहार सँगसँगै यो टुर्नामेन्ट, एनपीएललाई पनि त्यही उत्सवमा अझ बढी रमाऔँ, यसमा खुसी साटासाट गरौँ। सम्पूर्ण नेपालीलाई एउटा छानोमा, एउटा छातामा ल्याउने भनेकै एनपीएल भइरहेको अवस्थामा र क्रिकेट भइरहेको अवस्थामा यो चाहिँ अझ उत्तम समय हो।
क्रिकेट फ्यानहरू दसैं र तिहार मनाउन गाउँ गएका बेला एनपीएल हुने भएकाले दर्शकको अभाव हुन्छ कि भन्ने लाग्दैन ?
दर्शकले आफ्नै ठाउँबाट, आफ्नो परिवारसँग बसेर एनपीएलमा रमाउनुहेछ भन्ने लाग्छ । कतिपय फ्यानहरू टिकट किन्छु भनेर पनि पाउनुभएको थिएन, उहाँहरूलाई पनि मौका हुनेछ। कसैले चाहिँ आफ्नो परिवारसँग क्रिकेट हेरेर रमाइलो गरौँ भनेर सोचिरहनुभएको थियो, उहाँहरूले आफ्नो परिवारसँग हेरेर रमाउनु हुनेछ । विदेशबाट कतिपय हाम्रा फ्यानहरू यसकै लागि मात्रै पनि आउने कोसिस गरिरहनुभएको थियो र अहिले चाहिँ उहाँहरूलाई मौका भए जस्तो लाग्छ मलाई— दशैँ तिहार पनि सँगै मनाउने र एनपीएल सँगै हेर्ने ।
त्यस्तै, अन्तर्राष्ट्रिय खेलाडीहरू ल्याउन खोजिरहेका छौँ, ठूला खेलाडीहरू ल्याउन खोजिरहेका छौँ, त्यसको लागि पनि उहाँहरूको सेड्युल खाली हुने भएकाले यो समय उपयुक्त हो । एनपीएल सकिने आईपीएललगायतका टुर्नामेन्ट छन्, त्यो कारणले पनि यो एकदमै उत्तम समय हो।
लुम्बिनी लायन्सले पहिलो सिजनमा खराब प्रदर्शन गर्यो दोस्रो सिजनको विजेता बन्यो । तेस्रो सिजनमा कस्तो गर्ला ?
हामी पक्कै पनि एकदमै राम्रो क्रिकेट खेल्नेछौँ । पहिलो सिजनको बारेमा तपाईंले भनिहाल्नुभयो, त्यो सेटब्याकले हामीलाई पक्कै पनि धेरै ठूलो शिक्षा सिकायो र दोस्रो सिजनमा पनि हामीले उतारचढाव हुँदै च्याम्पियन बन्यौँ । साच्चै आत्मविश्वास राख्यौँ र हामीले आफ्नो कोचिङ स्टाफदेखि लिएर खेलाडीहरूको विश्वासलाई सपोर्ट गर्यौँ भने पक्कै पनि हामी लक्ष्यउन्मुख हुन्छौँ । त्यो लक्ष्य हामीले दोस्रो सिजनमा हासिल गरेका छौं । अहिले अझ त्यसमा पनि केही कमी कमजोरी छन् भने सुधार्ने कोसिस गरेका छौं। तेस्रो सिजनमा लुम्बिनी लायन्सको अझ राम्रो हुन्छ, अझ राम्रो क्रिकेट खेल्नेछौँ। जित-हार पक्कै पनि हुनेछ, एउटा पार्ट अफ द गेम। तर हामीले ट्रफी डिफेन्ड गर्नै अगाडि बढेका छौँ ।
दोस्रो सिजनमा लुम्बिनी लायन्स च्याम्पियन भयो । तर, प्रतियोगिताको बीचमा तपाईंले सामाजिक संजालमा लेखेको कुरा भाइरल भयो। त्यसलाई कसरी स्मरण गर्नुहुन्छ ?
कहिलेकाहीँ के हुँदो रहेछ भने म पनि त एउटा व्यक्ति हुF, एउटा टिमको चेयरम्यानसँगसँगै म आफ्नै क्लबको फ्यान पनि हुँ! कहिलेकाहीँ त्यो भावना रोक्न सकिँदो रहेनछ, त्यो बाहेक केही पनि कुरा होइन हैन, एउटा भावना निस्केको मात्रै हो।
तर, त्यो भावनाले च्याम्पियन बनायो नि त!
त्यो एउटा कोइन्सिडेन्ट जस्तो भयो, त्यति मात्रै हो। किनकि हामी सबै लागेका थियौँ, खेलाडीहरू त्यसरी नै लाग्नुभएको थियो, हामी म्यानेजमेन्ट टीमको तर्फबाट त्यसरी नै लागेका थियौँ र अब जुन अपेक्षित नतिजा आउँदैन, त्यो हुँदा चाहिँ कहिलेकाहीँ भावनात्मक पोखाइ हुँदो रहेछ । र हामीलाई चाहिँ के भयो भने पहिलो सिजनमा पनि त्यस्तै भएको र दोस्रो सिजनमा पनि फेरि त्यस्तै कन्टिन्यु हुँदाखेरि चाहिँ अलिकति त्यो भावनात्मक कुरा मात्रै थियो।
एनपीएल तेस्रो सिजका लागि अरु फ्रेन्चाइज टीमहरूमा अन्तर्राष्ट्रिय हेभीवेटको खेलाडीहरू आबद्ध भएका छन् तर लुम्बिनी लायन्सले अन्तर्राष्ट्रिय खेलाडीलाई चाहिँ त्यस्तो धेरै प्राथमिकता दिएन, किन?
हामीसँग राष्ट्रिय खेलाडीहरूका कारणले राम्रो स्थितिमा छौँ। राष्ट्रिय खेलाडी स्टारहरू हामीसँग भरिएका छन्, उहाँप्रति हाम्रो भरोसा र सम्मान छ। सँगसँगै अन्तर्राष्ट्रिय खेलाडीहरू हेर्नुभयो भने हाम्रा प्रुभन खेलाडीहरू नै हामीले ल्याएका छौँ। स्टार होइनन् भनेर पक्कै पनि भन्दिनँ, किनकि डार्सी सर्ट, जसले अस्ट्रेलियामा खेलेर उहाँहरूले बिग ब्यासमा चाहिँ एकदमै राम्रो छाप छोड्नुभएको छ, अस्ट्रेलियाको ओपनिङ जोडीको रूपमा उहाँ कहलिनुभएको छ, र उहाँ फेरि पनि आइरहनुभएको छ।
दोस्रो सिजनमा उहाँले एकदमै राम्रो आफ्नो छाप छोड्नुभएको थियो। सँगसँगै अब निरोशन डिकवेला, उहाँ अहिले पनि श्रीलंकाको टिममा हुनुहुन्छ हैन, विकेटकिपर ब्याट्सम्यान हुनुहुन्छ। उहाँ पनि सानो नाम पक्कै पनि होइन। दोस्रो सिजनमा प्लेयर अफ द टुर्नामेन्ट हुनुभएको रुबेन ट्रम्पलम्यान हुनुहुन्छ। उहाँहरूलाई हामीले कसरी सानो खेलाडी भन्ने? उहाँहरू नै हाम्रो स्टार हो।
अब हामीले जुन रिभिल गर्न खोजिरहेका छौँ एक-दुई वटा खेलाडीहरू, छिट्टै उहाँहरू पनि राम्रो खेलेर अगाडि आइरहनुभएको छ ।
लुम्बिनी लायन्सको कप्तान रोहित पौडेल जो नेपाली राष्ट्रिय टोलीको पनि पूर्वकप्तान हो, उहाँको बारेमा के छ धारणा?
उहाँ फर्ममा हुनुहुन्छ, र मलाई लाग्छ यो बरकरार रहनेछ। दोस्रो सिजनमा पनि एनपीएलमा धेरै नै राम्रो खेल्नुभयो। त्यो बेलादेखि मात्रै होइन, उहाँदेखि पहिलो सिजनदेखि नै उहाँ नै हाम्रो क्याप्टेन मात्रै नभएर, मार्की प्लेयर र स्टार नै उहाँ हो। त्यो भएको कारणले हामी एकदमै ढुक्क छौँ कि यो सिजन पनि उहाँले पक्कै पनि राम्रो खेल्नुहुनेछ र लुम्बिनी लायन्सलाई फेरि च्याम्पियन्सउन्मुख बाटोमा चाहिँ लैजानुहुनेछ। सम्भवतः फेरि डिफेन्ड पनि हामीले गर्न सक्छौँ भन्ने चाहिँ मलाई लागिरहेको छ।
पौडेल जतिबेला लुम्बिनीमा जोडिनुभयो त्यतिबेला राष्ट्रिय टोलीको क्याप्टेन हुनुहुन्थ्यो। त्यतिबेला तपाईंले लुम्बिनी लायन्समा उहाँलाई नै क्याप्टेन रोज्नुपर्ने कारण के थियो ?
उहाँसँग सबैलाई मिलाएर लाने नेतृत्व क्षमता राम्रो छ । उहाँले आफूलाई लागेका कुराहरू एकदमै प्रस्ट राख्नुहुन्छ— चाहे त्यो म्यानेजमेन्टलाई होस्, चाहे त्यो टेक्निकल कमिटी होस्, चाहे कोचिङ होस्, चाहे प्लेयरहरूलाई होस् । र, उहाँ एउटा छोटो तथा सानो उमेरमै देशको क्याप्टेन बनेर धेरै सफलता देखाइसक्नुभएको छ। त्यो कारणले पनि उहाँ हाम्रो लागि र देशकै लागि पनि एकदमै राम्रो खेलाडी हो, ठुलो खेलाडी हो। उहाँ अझै लामो समय खेल्नुहुन्छ र देशलाई प्रतिनिधित्व गर्नुहुन्छ। लुम्बिनी लायन्सले पनि यसैगरी प्रतिनिधित्व गर्दै राम्रा राम्रा सफलताहरू दिलाउनुहुनेछ भन्ने चाहिँ हामीलाई लाग्छ।
लुम्बिनी लायन्स एउटा प्रदेशसँग जोडिएको क्रकेट टीम छ । तपाईंहरूले आफ्नो प्रदेशमा या आफ्नो क्षेत्रमा रहेका क्रिकेट प्रेमीहरट्ठलाई जोड्न के योजना बनाउनुभएको छ?
हामीले पहिलो सिजनदेखि नै विभिन्न कार्यक्रम गर्दै आइरहेका छौं, चाहे हाम्रा लुम्बिनी लायन्सका फ्यानहरूलाई गर्ने सम्मानको रूपमा होस् चाहे हामी ट्रफी जितिसकेपछि १२ वटै जिल्लाका कुनाकुनाहरूमा त्यहाँका एकदमै प्रसिद्ध ठाउँहरूको भ्रमणदेखि लिएर घुमाउने होस्। सामाजिक संजालबाट जोडिने समर्थकहरूसँग अन्तरक्रियामा जोडेका छौं। सँगसँगै स्थानीय तहलाई राष्ट्रियकरण र अन्तर्राष्ट्रियकरण गर्न क्रिकेटका माध्यमबाट सक्छौं भन्ने पाटो छँदैछ। खेलप्रेमी र क्रिकेटप्रेमीलाई उद्यमशीलतासँग जोड्न कसरी सकिन्छ भन्ने कुराहरू पनि अगाडि बढाइहेका छौं। त्यसका लागि काम चाहिँ गरिरहेका छौँ। हामी जब टुर्नामेन्ट आउँछ, त्यो बेला मात्रै काम गरिरहेको छैनौँ।
हाम्रो बाह्रै महिना क्रिकेटसँग, खेलसँग र अरु उद्यमशीलतासँग जोडेर हामी के काम गर्न सक्छौँ भनेर सोचिरहेका हुन्छौं। यसको कारणले पनि हामीलाई के लाग्छ भने, लुम्बिनी लायन्सका फ्यानहरूलाई जसरी हामी सम्मानका सहित एउटा ‘लुम्बिनीयन रेड पल्टन’ भनेर जुन हामीले एउटा परिवार सम्झेर, पारिवारिक सदस्यको रूपमा अगाडि बढिरहेका छौँ र आगामी दिनमा अझ त्यो घनिष्ठतातर्फ अगाडि बढाउनेछौँ।
क्रिकेट टीमको समर्थक हुनका लागि वा त्यो टीमसँग जोड्नका लागि के आवश्यक पर्ने रहेछ?
खेल त राम्रो हुनै पर्यो र सँगसँगै एउटा चर्चित अनुहारहरू जसलाई चाहिँ उहाँहरूले आइडल मानेर अगाडि बढ्नुहुन्छ, त्यो दुइटै कारणले गर्दा खेरि नै फ्यान बेस पक्कै पनि अझ राम्रो हुन्छ भन्ने लाग्छ।
मुलुकको अर्थतन्त्र कमजोर भएको अवस्थामा लुम्बिनी लायन्सलाई पनि प्रभाव परेको छ कि? टीमको स्पोन्सर र ब्रान्डसँग साइनिङमा कमी आएको हो?
होइन, हामीसँग एक-दुई वटा ब्रान्डहरू छन्। अझ ठुलठुला ब्रान्डहरू साइनिङ हुने चरणमा छन्। मलाई के लाग्छ भने, हामीसँग मात्र होइन आठवटै फ्र्यान्चाइजहरूलाई जुन पहिलो वर्ष एउटा धेरै ब्रान्डहरूले अथवा प्राइभेट सेक्टरले त्यति स्वीकार गरिरहेको अवस्था थिएन हैन— कसरी जाने हो टुर्नामेन्ट, कसरी जाने हो, यहाँभन्दा अगाडि पनि यस्ता धेरै प्रतियोगिताहरू भएका थिए भनेर जुन पहिलो वर्ष चाहिँ उहाँहरूले त्यति स्वीकार गर्नुभएको थिएन, तथापि धेरै ठुलठुला ब्रान्डहरू चाहिँ एनपीएल र हाम्रा ब्रान्डहरूसँग एसोसिएट हुनुभएको थियो। त्यसले गर्दा खेरि हामीलाई एउटा जुन एउटा जोस पछिल्लो अवस्थामा भएको थियो, तर दोस्रो वर्ष र तेस्रो वर्ष आउँदा खेरि एकदमै बढिरहेको अवस्था छ।
दोस्रो सिजनमा आन्दोलनको चपेटामा र अहिले ठूलो प्राकृतिक विपत्तिको अवस्था पछि नै हामीले काम गर्न लागिरहेको भए होला, कतिपय ब्रान्डहरू अथवा कम्पनीले चाहिँ अलि पछि पछि मात्र निर्णय गरिरहनुभएको अवस्था थियो। तर यो हप्ता हेर्नुभयो भने मलाई लाग्छ अरुअरु फ्र्यान्चाइजको पनि त्यस्तै अवस्था छ। अब चाहिँ एकदमै राम्रो, सकारात्मक भएर उहाँहरू फर्किनुभएको छ र एनपीएल ३ भव्य नै हुन्छ।
तपाईंको व्यक्तिगत कुरा गरौं, अन्य क्षेत्रमा राम्रो व्यवसाय गरिरहेको बेला क्रिकेट रोज्नु पछाडिको कारण के हो?
मलाई के लाग्छ भने, कुनै पनि काम गर्नुभन्दा अगाडि त्यो कामसँग तपाईँको सपना जोडिनुपर्छ। त्यो कारणले क्रिकेट प्यासन हो। सानैदेखि नै एउटा प्यासनको रूपमा अगाडि मैले लिइरहेको थिएँ। चाहे यसलाई कुनै समय मनोरञ्जनको रूपमा लिएँ होला, कुनै समय आफूले टेनिस बल खेले पनि हैन— म पनि अब कलेज लाइफमा एउटा टेनिस बल क्रिकेट खेलेको मान्छे हुँ। त्यो कारणले पनि मलाई के लाग्थ्यो भने क्रिकेट चाहिँ नेपालमा अलिकति राम्रै हुन्छ ।
जब इन्डियामा आइपीएल सुरु भइसक्यो र आइपीएलले राम्रो फड्को मारिसकेपछि नेपालमा पनि साच्चै एनपीएल हुने हो भने यसले चाहिँ एउटा रूप लिन सक्छ भन्ने चाहिँ मलाई त्यो लागिरहेको थियो। त्यो मेरो सपनासँग यो जोडिएको भएको कारणले गर्दाखेरि मलाई फाइदा-बेफाइदा भन्नाले पनि म एउटा आफ्नो प्यासनसँग चाहिँ जोडिएको क्रिकेटसँग जोडिएको हो।
यो घाटा-नाफासँग जोडेर क्रिकेट क्षेत्रमा आएको होइन। मैले केही भएन भने पनि देशलाई कन्ट्रीब्युसन गर्नेछु, क्रिकेटमा लगानी गरेको भनेर त्यो स्वरूपमा चाहिँ म अगाडि आएको हो।
संवादको पूरा भिडियो हेर्न यो लिंकमा जानुहोस्–
‘नेपाली खेलाडी आफैँमा राम्रा छन्, अझै निखार्दै अन्तर्राष्ट्रिय स्तरमा पुर्याउनु छ’
पाँच वर्षपछि लुम्बिनी लायन्सलाई कहाँ पुर्याउने सपना छ?
अब लुम्बिनी लायन्ससँगसँगै नेपाली क्रिकेट साच्चै पाँच वर्षपछि राम्रो स्केलमा हुनेछ जस्तो लाग्छ। एउटा राम्रो अन्तर्राष्ट्रिय स्तरमा यसले जुन अहिले नाम कमाइरहेको छ, आइसीसीले मान्यता दिन्छ र खेलाडीहरू पनि अझ जन्मिँदैछन्। अहिलेका खेलाडीहरू अझ निखारिनुहुन्छ। जसरी हामीलाई चाहिँ राष्ट्रिय रूपमा पनि हैन, तमाम हाम्रा फ्यानहरू, तपाईँहरू जस्ता मिडियाकर्मीहरू, सरकार लगायत सबैले जसरी हामीलाई समर्थन गरिरहनुभएको छ, खेललाई समर्थन गरिरहनुभएको छ, हामीले पनि जसरी हामीले आफ्नो डेडिकेसन अगाडि लगाइरहेका छौँ। यी कारणले गर्दाखेरि क्रिकेट एउटा खेल मात्र होइन, यो नेपाललाई चिनाउने एउटा माध्यम पनि बन्नेछ भन्ने मलाई लाग्छ। र, पाँच वर्षमा त साच्चै नै एउटा यो राम्रो जग बसिसकेको हुन्छ।
एनपीएलमा लगानी त ठुलो हुन्छ, यसको टिकट, ब्रान्ड र स्पोन्सरमध्ये तपाईँलाई चाहिँ दीर्घकालीन एउटा स्रोत चाहिँ के होला जस्तो लाग्छ?
यो ब्रान्ड भ्यालु नै हो। जबसम्म हाम्रा यस्ता भगवानरूपी फ्यानहरू हुनुहुन्छ, उहाँहरूको माया रहँदासम्म, यो ब्रान्ड त्यसै बढिरहन्छ। तपाईँले भनेजस्तो टिकट, जर्सी, ब्रोडकास्टिङ भनेको त्यससँगसँगै जोडेरै आइरहने हो। त्यो भएको कारणले जबसम्म हाम्रा फ्यानहरूले अझ बढी क्रिकेट बुझ्नुहुन्छ, अझ धेरै यसमा सामेल हुनुहुन्छ— चाहे प्रत्यक्ष-अप्रत्यक्ष, टिभी हेरेर होस् अथवा ग्राउन्डमा आएर होस्, चाहे आफ्नो सामाजिक सञ्जालमा यसको विषयमा कुरा गरेर होस्।
एनपीएलले प्रत्यक्ष रूपमा धेरै रोजगारी पनि सिर्जना गर्दैछ। त्यो कारणले गर्दाखेरि यसले त्यतिकै मनोरञ्जनको रूप मात्रै होइन, यो उद्योग बन्ने हो। त्यो कारणले चाहिँ हामीले खेलकुद एउटा मनोरञ्जन गर्ने कुरा अथवा स्वास्थ्यको लागि खेलिने कुरा मात्रै होइन, खेलकुद अब एउटा उद्योग बन्नुपर्छ भन्ने हो। त्यो उद्योगभित्र तपाईँहरू पनि रहनुहुन्छ, हामीहरू पनि रहन्छौँ, खेलाडी पनि रहनुहुन्छ, यससँग एसोसिएट ब्रान्डहरू रहनुहुन्छ, यससँग एसोसिएट सरकारी गैरसरकारी संघ-संस्थाहरू रहनुहुन्छ। त्यो भएको कारणले अब खेलकुद एउटा उद्योग बनाउने हो भनेर जुन म लगायत धेरै हामीहरू पनि लगाइरहेका छौँ र यसको लागि चाहिँ म साच्चै एउटा उद्योग वाणिज्य महासंघको तर्फबाट पनि म लबी गरिरहेको अवस्था भएको कारणले, खेलकुद एउटा उद्योग हो र यसलाई उद्योगसरह मान्यता दिनुपर्छ भन्ने आवाज हामीले उठाउन खोजिरहेका छौँ। त्यसकारणले गर्दाखेरि चाहिँ यो एउटा अब उद्योग बन्नेतिर जाने हो र यसले देशलाई प्रत्यक्ष रूपमा आर्थिक रूपमा योगदान दिन्छ।
एनपीएलका प्रतियोगिता काठमाडौंमा मात्र भइरहेका छन्। प्रदेशहरूमा पनि यसका खेलहरू आयोजना गर्नेबारे तपाईंको धारणा के छ?
हामी एकदमै खुसी छौँ, र गर्व लाग्छ हामीलाई चाहिँ आफ्नै ठाउँमा एक्स्ट्राटेक ओभलसँग स्ट्र्याटेजिक पार्टनरसिपमा अगाडि बढिरहेका छौँ र हामीले आफ्नो होम ग्राउन्डमा हामी तयारीहरू पनि गरिरहेका छौँ। पहिलो वर्षदेखि नै हामीले त्यही तयारी गरेर हामी अगाडि बढिरहेका छौँ। मलाई के लाग्छ भने, एनपीएल अब होम एन्ड अवे हुनुपर्छ। प्रत्येक ठाउँमा, कम्तीमा प्रत्येक टोलीको एउटा होम ग्राउन्डमा एनपीएल हुनुपर्छ र आफ्नो टीमलाई आफ्नै घरमा स्वागत गर्न सम्पूर्ण फ्यानहरूले पाउनुपर्छ र उहाँहरूले त्यो गेम हेरेर रमाइलो गर्न पाउनुपर्छ।
सरकारले यदि गर्न सक्नुहुन्छ, उहाँहरूले स्टेडियमहरू बनाउन सक्नुहुन्छ भने ठिक छ, मोर देन वेलकम। यदि सक्नुहुन्न भने पनि प्राइभेट-पब्लिक पार्टनरसिपमा हामीसँग हातेमालो गरेर, हामीले त्यो काममा पनि अग्रसर हुन्छौँ र आठवटा क्लबले आठवटा होम ग्राउन्डमा खेल हुन्छ ।
