काठमाडौं । मिस नेपाल–२०२६ को उपाधि दीपमाला ढकालले जितेकी छन्। ललितपुरको द प्लाजा पुल्चोकमा आयोजित ग्रान्ड फिनालेमा उनी मिस नेपाल वर्ल्ड २०२६ घोषित भएकी हुन्।
यसैगरी, आर्या निशान्त मिस नेपाल इन्टरनेशनल २०२६ तथा कशिश सुब्बा मिस नेपाल कोस्मो २०२६ घोषित भएका छन्। प्रतियोगितामा मिस कोस्मो योलिन्डा लिंडक्विस्टसहित विभिन्न क्षेत्रका विशिष्ट व्यक्तित्व निर्णायकको भूमिकामा सहभागी थिए। प्रतियोगिताको आयोजना द हिडन ट्रेजरले गरेको हो।
दीपमाला यसअघि मिस नेपाल हङकङ इन्टरनेशनल–२०२६ को उपाधि पनि जितिसकेकी छन्। उनी विश्वप्रसिद्ध लगानी व्यवस्थापन कम्पनी ब्ल्याकरकमा इन्भेस्टमेन्ट स्ट्राटेजिस्टका रूपमा कार्यरत छन्।
व्यावसायिक जीवनसँगै उनी ब्ल्याक बेल्ट तेक्वान्दो खेलाडी, रनवे मोडल, अन्तर्राष्ट्रिय कार्यक्रम सञ्चालक (होस्ट) तथा म्याराथन धाविकाका रूपमा पनि परिचित छन्।
दीपमाला गैरआवासीय नेपाली संघ (एनआरएनए) को इतिहासमै सबैभन्दा कम उमेरमा निर्वाचित सदस्य बनेकी थिइन्। साथै, उनी नेपाल क्यान्सर अस्पतालकी गुडविल एम्बास्डरका रूपमा समेत सक्रिय छिन्।
उनले मिस वर्ल्डको मञ्चमार्फत क्यान्सरसम्बन्धी जनचेतनाको अभियानलाई अन्तर्राष्ट्रिय स्तरमा विस्तार गर्ने लक्ष्य रहेको बताउँदै आएकी छन्।
रोचक संयोग के छ भने, उनकी आमाले पनि सन् १९९४ मा आयोजित पहिलो मिस नेपाल प्रतियोगितामा सहभागिता जनाएकी थिइन्।
