काठमाडौं । नेपाली कांग्रेसले संविधान संशोधनबारे आफ्नो आधिकारिक दृष्टिकोण सार्वजनिक गर्ने भएको छ। पार्टी सभापति गगनकुमार थापाले ‘संविधान संशोधनमा नेपाली कांग्रेसको दृष्टिकोण’ शीर्षकको दस्तावेज आज सार्वजनिक गर्ने कार्यक्रम तय भएको हो।
यसका लागि आज दिउँसो ३ बजे ललितपुरस्थित पार्टी केन्द्रीय कार्यालयमा विशेष कार्यक्रम आयोजना गरिएको छ।
संविधान संशोधनसम्बन्धी अध्ययन तथा सुझाव तयार गर्न कांग्रेसले उपसभापति पुष्पा भुसालको संयोजकत्वमा विज्ञ समिति गठन गरेको थियो। समितिमा वरिष्ठ अधिवक्ताहरू राधेश्याम अधिकारी, हरिहर दाहाल, प्रेमबहादुर खड्का, उपेन्द्रकेशरी न्यौपाने, शेरबहादुर केसी, यदुनाथ खनाल, गोपालकृष्ण घिमिरे, योगेन्द्रबहादुर अधिकारी, दिनेश त्रिपाठी, सीताराम केसी र ललितकुमार बस्नेत सदस्य छन्। त्यस्तै अधिवक्ताहरू रनबहादुर थेवे, शर्मिला श्रेष्ठ र झलमाया विक पनि समितिमा आबद्ध छन्। समितिको सदस्य–सचिवको जिम्मेवारी अधिवक्ता राजु कटुवालले सम्हालेका छन्।
उक्त समितिले तयार पारेको अध्ययन प्रतिवेदन र सुझावका आधारमा कांग्रेसले आफ्नो औपचारिक धारणा सार्वजनिक गर्न लागेको हो।
संविधान संशोधनका विषयमा प्रमुख राजनीतिक दलहरूबीच मतभिन्नता कायम रहेका बेला कांग्रेसको यो कदमलाई राजनीतिक रूपमा अर्थपूर्ण मानिएको छ।
यसअघि संविधान संशोधनसम्बन्धी बहस र प्रक्रियालाई अघि बढाउने उद्देश्यले गठन गरिएको ‘संविधान संशोधन बहसपत्र कार्यदल’ बाट नेकपा (एमाले), नेपाल कम्युनिस्ट पार्टी, जनता समाजवादी पार्टी (जसपा), लोकतान्त्रिक समाजवादी पार्टी (लोसपा) र राष्ट्रिय जनमोर्चाले (राजमो) बाहिरिने निर्णय गरेका थिए।
प्रमुख दलहरूको बहिर्गमनपछि संविधान संशोधनको बहस थप जटिल बनेको अवस्थामा प्रमुख प्रतिपक्षी दल नेपाली कांग्रेसले सार्वजनिक गर्न लागेको आधिकारिक दृष्टिकोणलाई राजनीतिक वृत्तमा चासोका साथ हेरिएको छ।
