काठमाडौं । नेपाली कांग्रेसमा महाधिवेशनसम्बन्धी मतभेद समाधान गर्न सभापति शेरबहादुर देउवा, कार्यवाहक सभापति पूर्णबहादुर खड्का र महामन्त्रीद्वय गगन थापा तथा विश्वप्रकाश शर्माबीच आज फेरि छलफल हुन लागेको छ।
लगातार तेस्रो दिन हुँदै आएको संवाद आज दिउँसो २ बजे देउवा बसोबास गर्दै आएका महाराजगञ्जस्थित निवासमा हुनेछ। महाधिवेशन कहिले गर्ने भन्ने विषयमा सहमति नजुटेकाले कांग्रेस नेतृत्व तहमा छलफल अझै जारी छ।
देउवा पक्ष महाधिवेशन प्रतिनिधिसभा चुनावपछि गर्ने पक्षमा देखिँदै आएको छ भने सभापति देउवा स्वयं पुसमा गर्ने सम्भावना खुला राखिरहेका छन्। दुई महामन्त्री भने नियमित महाधिवेशन सम्भव नभए विशेष महाधिवेशनका पक्षमा छन्।
२८ असोजदेखि रोकिएको केन्द्रीय कार्यसमिति बैठक सहमतिका लागि स्थगित छ तर शीर्ष तहको निरन्तर संवादबाट पनि एकिन निष्कर्ष न निस्कँदा पार्टीभित्र अनिश्चितता थपिएको छ।
