चन्दा क्षेत्री/काठमाडौं । नेपालमा पहिलोपटक चारदेशीय यू–२० जुनियर अन्तर्राष्ट्रिय कबड्डी कप आयोजना हुने भएको छ। अखिल नेपाल कबड्डी संघको आयोजनामा हुन लागेको प्रतियोगितामा नेपाल, भारत, बंगलादेश र थाइल्यान्डका जुनियर राष्ट्रिय टोली सहभागी हुनेछन्।
प्रतियोगिता मंसिर ५ गतेदेखि सातदोबाटोस्थित तेक्वान्दो हलमा सुरु हुनेछ। प्रतियोगिताबारे जानकारी दिन शुक्रबार काठमाडौंको होटल येलो प्यागोडामा आयोजित पत्रकार भेटघाट तथा ट्रफी अनावरण कार्यक्रममा संघका महासचिव अरविन्द कुमार झाले नेपालकै पहल र अगुवाइमा प्रतियोगिता आयोजना हुन लागेको बताए।
उनका अनुसार नेपाल, मलेसिया, बंगलादेश र थाइल्यान्डका प्रतिनिधिबीच थाइल्यान्डको पटायामा भएको एसियाली कबड्डी फेडेरेसनको बैठकमा प्रतियोगिता आयोजना गर्ने अवधारणा अघि बढेको थियो। पहिलो संस्करण नेपालमा आयोजना गर्ने र त्यसपछि पालैपालो अन्य देशमा सञ्चालन गर्ने सहमति भएको थियो।
मलेसियाको आन्तरिक कारणले उसको राष्ट्रिय टोली सहभागी हुन नसकेपछि भारतलाई आमन्त्रित टोलीका रूपमा समावेश गरिएको झाले जानकारी दिए। आगामी संस्करणमा भारतको स्थानमा इरान वा चाइनिज ताइपेईजस्ता अर्को राष्ट्रलाई सहभागी गराउने योजना रहेको उनले बताए।
प्रतियोगिता लिग चरणपछि शीर्ष दुई टोलीबीच फाइनल खेलाउने प्रणालीमा सञ्चालन हुनेछ। नेपाली टोलीले लामो समयदेखि जनकपुरमा प्रशिक्षण गरिरहेको र तयारी राम्रो रहेको झाले बताए।
उनका अनुसार प्रतियोगिताको मुख्य उद्देश्य जुनियर खेलाडीलाई अन्तर्राष्ट्रिय अनुभव दिलाउनुका साथै नेपाली कबड्डीको भविष्यका लागि बलियो आधार तयार गर्नु हो। एसियाली खेलकुदमा लगातार दुईपटक कांस्य पदक जितेको नेपाली महिला कबड्डी टोलीको सफलताले पनि यस खेलको सम्भावना देखाएको छ।
झाले बंगलादेशमा आयोजित प्रतियोगितामा नेपाली टोली दोस्रो भएको तथा इरानमा भएको जुनियर प्रतियोगितामा १२ राष्ट्रमध्ये तेस्रो स्थान हासिल गरेको जानकारी दिए। यिनै उपलब्धिलाई आधार बनाएर आगामी एसियाली खेलकुदमा स्वर्ण पदक जित्ने लक्ष्यसहित जुनियर खेलाडीको तयारी अघि बढाइएको उनको भनाइ छ। भारत, इरान वा चाइनिज ताइपेईमध्ये कुनै एक टोलीसँग फाइनल खेलेर उपाधि जित्ने नेपालको लक्ष्य रहेको उनले बताए।
यसैगरी, आगामी जनवरीदेखि मार्चसम्म सातौँ कमन एसियन च्याम्पियनसिप पनि नेपालमै आयोजना गर्ने तयारी भइरहेको उनले जानकारी दिए। त्यसका लागि अन्तर्राष्ट्रिय फेडेरेसनमा प्रस्ताव पठाइसकिएको र स्वीकृतिको प्रक्रियामा रहेको झाले बताए।
कबड्डीलाई ओलम्पिकमा समावेश गराउने प्रयास भइरहेको उल्लेख गर्दै उनले सन् २०३६ मा भारतमा ओलम्पिक आयोजना गर्ने प्रस्ताव अघि बढेको सन्दर्भमा कबड्डी पनि समावेश हुन सके नेपालले यस खेलमार्फत ओलम्पिक पदक जित्ने सम्भावना रहेको बताए।
सरकारले कबड्डीलाई राष्ट्रिय बजेटमा महत्त्व दिनुका साथै एसियाली खेलकुदमा महिला र पुरुष दुवै टोलीलाई सहभागी गराउने अवसर दिएकोमा झाले धन्यवाद दिए। नेपाली कबड्डीलाई अन्तर्राष्ट्रिय स्तरमा थप उचाइमा पुर्याउन संघ प्रतिबद्ध रहेको बताउँदै उनले प्रतियोगितामा सहभागी भएर नेपाली टोलीको हौसला बढाउन खेलप्रेमी तथा दर्शकलाई आग्रह गरे।