काठमाडौँ । नेपाली कांग्रेसको १५औँ महाधिवेशनअन्तर्गत ६३ जिल्लामा वडा अधिवेशन सम्पन्न भएको छ ।
कांग्रेस केन्द्रीय निर्वाचन समितिका सदस्य–सचिव राजु कटुवालले सोमबार ६३ जिल्लाको वडा अधिवेशन सम्पन्न भएको जानकारी दिएका हुन् । कांग्रेसको केन्द्रीय महाधिवेशन आगामी असोज १६ देखि १९ गतेसम्म काठमाडौँमा हुँदैछ ।
कटुवालका अनुसार धनुषा क्षेत्र नम्बर ४, मोरङ क्षेत्र नम्बर ६, अछामका तीन वडा, नवलपरासी क्षेत्र नम्बर २, डडेल्धुराका चार वडा, रुपन्देहीका तीन वडा, महोत्तरीका आठ वडा, सप्तरी क्षेत्र नम्बर २ र ४, सिरहा, रौतहट क्षेत्र नम्बर १ तथा सर्लाही क्षेत्र नम्बर २ का वडामा अधिवेशन अन्तिम चरणमा पुगेको छ ।
यस्तै, रसुवा, धादिङ र नुवाकोटका साथै असोज ५ गते अधिवेशन सम्पन्न हुन नसकेका वडाहरूमा मंगलबार असोज ६ गते पनि अधिवेशन जारी रहने कांग्रेस केन्द्रीय निर्वाचन समितिले जनाएको छ ।
