काठमाडौं । चलचित्र विकास बोर्डको बक्स अफिस विवरणअनुसार चलचित्र ‘गौंथली’ ले प्रदर्शनको तीन सातामै १९ करोड ७१ लाख रुपैयाँभन्दा बढीको व्यापार गरेको छ।
कपिल रिजाल निर्देशित ‘गौंथली’ साउन १ गतेदेखि देशभर प्रदर्शनमा आएको हो। चलचित्रले अपेक्षाकृत बलियो व्यापार गर्दै २०८३ सालकै सर्वाधिक कमाउने चलचित्रको रेकर्ड बनाएको छ।
चलचित्र विकास बोर्डको सिनेमा बक्स अफिसले साउन २४ गते मध्यरातसम्मको विवरण सार्वजनिक गर्दै ‘गौंथली’ले १९ करोड ७१ लाख ६ हजार रुपैयाँ ग्रस व्यापार गरेको जनाएको छ। बोर्डका अनुसार चलचित्र ७ लाख १५ हजार १९८ दर्शकले हेरेका छन्।
सामान्यतः असार–साउनलाई नेपाली चलचित्रका लागि व्यापारिक रूपमा सुस्त समय मानिन्छ। यो अवधिमा नयाँ चलचित्रको प्रदर्शनसमेत तुलनात्मक रूपमा कम हुने गरेको छ। तर ‘गौंथली’ले पछिल्ला केही वर्षदेखि कायम रहेको उक्त प्रवृत्तिलाई तोड्दै उल्लेखनीय व्यापार गर्न सफल भएको हो।
सिम्रन खड्का र अरुण क्षेत्रीको मुख्य भूमिका रहेको चलचित्र अहिले प्रदर्शनको चौथो सातामा प्रवेश गरेको छ। बक्स अफिसमा उत्साहजनक कमाइसँगै चलचित्रप्रति दर्शकको आकर्षण पनि बलियो देखिएको छ।
