तानसेन । पाल्पामा अपाङ् महिलामाथि जबरजस्ती करणी गर्ने पुरुषलाई प्रहरीले नियन्त्रणमा लिएको छ ।
शुक्रबार बेलुका ११:३० बजेको समयमा पाल्पाको रामपुर नगरपालिका बस्ने (घ) बर्गको अपाङ्गता परिचय पत्र प्राप्त गरेकी बर्ष ४६ की महिलालाई आफ्नै कोठामा सुतिरहेको अवस्थामा करणी गरेको अभियोगमा प्रहरीले एक पुरुषलाई पक्राउ गरेको छ ।
यसरी पक्राउ पर्नेमा रामपुर नगरपालिका-१० मगरे बस्ने बर्ष ३६ को मेघ बहादुर सारु रहेको जिल्ला प्रहरी कार्यालय पाल्पाका प्रवक्ता डिएसपी वीरेन्द्र थापाले केटिएम दैनिकलाई बताए ।
थापाका अनुसार आज बिहान पिडितको भाई बुहारीले जिल्ला प्रहरी कार्यालय पाल्पामा जाहेरी दिएपछि ईलाका प्रहरी कार्यालय रामपुरबाट प्रहरी अनुसन्धान अधिकृत सहितको टोलीले मेघ बहादुर सारुलाई नियन्त्रणमा लिएको हो ।
नियन्त्रणमा लिइएका व्यक्तिलाई जिल्ला प्रहरी कार्यालय पाल्पामा ल्याई आवश्यक अनुसन्धान गरिरहेको डिएसपी थापाले बताए ।
के हो ‘घ’ वर्गको अपाङ्गता
सरकारी तथा गैरसरकारी निकायहरूबाट अपाङ्गता भएका व्यक्तिहरूका लागि प्रवाह गरिने सेवासुविधा, अवसर र अधिकारको न्यायपूर्ण र प्रभावकारी वितरण होस् भन्ने उद्देश्यले नेपाल सरकारले अपाङ्गता परिचयपत्रको व्यवस्था गरेको छ ।
अपाङ्गता परिचय पत्र क,ख,ग र घ गरी चार प्रकारका हुन्छन् ।
शारीरिक अङ्गहरूमा सामान्य विचलन भए तापनि दैनिक जीवन सम्पादनमा कुनै कठिनाइ नहुने, हात वा खुट्टा केही छोटो भएका, ठूलो अक्षर पढ्नसक्ने, न्यून दृष्टियुक्त व्यक्तिहरू, हत्केलामुनिका कम्तीमा बूढीऔँला र चोरऔँला भएका, खुट्टाको औँलाका भागहरू नभएका, श्रवणयन्त्र लगाई वा नलगाई ठूलो आवाज सुन्ने तर बोली स्पष्ट भएका सुस्त श्रवण व्यक्तिहरू, स्मरणशक्ति ज्यादै कम भई सिकाइमा कठिनाइ हुने बौद्धिक अपाङ्गता भएका व्यक्तिहरू “घ” वर्गमा पर्दछन् ।
