काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा रसुवामा आएको बाढीबाट उत्पन्न परिस्थितिबारे छलफल गर्न आज सर्वदलीय बैठक बस्दैछ।
रास्वपा प्रवक्ता जगदीश खरेलका अनुसार बैठक बिहान ९ बजे सिंहदरबारस्थित रास्वपा संसदीय दलको कार्यालयमा बस्नेछ।
बैठकमा बाढी प्रभावित क्षेत्रमा खोज तथा उद्धार, राहत व्यवस्थापन र पछिल्लो अवस्थाका विषयमा छलफल हुनेछ। साथै, विपद्का बेला राजनीतिक दलहरूबीच आवश्यक समन्वय कायम गर्ने तथा आगामी कदमबारे समेत छलफल गरिने प्रवक्ता खरेलले बताए।
रसुवाको रसुवागढी क्षेत्रलगायत विभिन्न स्थानमा आएको भीषण बाढीबाट ठूलो मानवीय तथा भौतिक क्षति भएको छ। प्रभावित क्षेत्रमा सुरक्षाकर्मी र सम्बन्धित निकायले खोज तथा उद्धार कार्यलाई निरन्तरता दिइरहेका छन्।
