काठमाडौं- प्रधानमन्त्री बालेन शाह बुधबार दिउँसो १ बजे प्रतिनिधि सभा बैठकमा कालो चस्मा लगाएरै उपस्थित हुने भएका छन्। संसदमा सांसदहरूसँग प्रत्यक्ष प्रश्नोत्तर हुने कार्यसूची रहेको छ।
सभामुख डोलप्रसाद अर्यालले प्रमुख सचेतक तथा सचेतकहरूमार्फत सांसदहरूलाई कालो चस्मा लगाएर बैठकमा उपस्थित नहुन आग्रह गरेका थिए। स्वास्थ्यसम्बन्धी कारणले चस्मा लगाउनुपर्ने अवस्था भए स्वास्थ्य परीक्षण रिपोर्टसहित कारण खुलाउन सभामुखले आग्रह गरेका थिए।
सभामुखको आग्रहपछि प्रधानमन्त्री शाहले आफूले कालो चस्मा लगाउनुपर्ने कारण खुलाउँदै संघीय संसद सचिवालयलाई पत्र पठाएका छन्। उनले आँखामा समस्या देखिएपछि कालो चस्मा प्रयोग गर्नुपरेको भन्दै स्वास्थ्य परीक्षणको रिपोर्टसमेत सचिवालयमा बुझाएका छन्।
प्रधानमन्त्री शाहले उज्यालोमा हेर्न असहज हुने समस्या भएपछि नेपाली सेनाको छाउनीस्थित सैनिक अस्पतालमा साउन २२ गते आँखाको परीक्षण गराएका थिए। उनको परीक्षण लेफ्टिनेन्ट कर्णेल डा. सचित ढकालले गरेका थिए।
स्वास्थ्य परीक्षण रिपोर्टअनुसार प्रधानमन्त्री शाहलाई उज्यालोमा हेर्न कठिन हुने समस्या देखिएको छ। साथै, आँखामा सुख्खापन हुने भएकाले आवश्यकताअनुसार आइड्रप प्रयोग गर्नुपर्ने चिकित्सकीय सुझाव दिइएको छ।
यही स्वास्थ्य अवस्थाका कारण कालो चस्मा लगाउनुपर्ने बाध्यता रहेको जानकारी प्रधानमन्त्रीले संसद सचिवालयलाई गराएका हुन्। त्यसैले सभामुखको आग्रहका बाबजुद प्रधानमन्त्री शाह बुधबारको संसद बैठकमा कालो चस्मामै उपस्थित हुने भएका छन्।
