काठमाडौं। नेपाली कांग्रेसका उपसभापति विश्वप्रकाश शर्माले पार्टीभित्रको विवाद अदालतमा नभई पार्टी कार्यालयमै संवाद र सहमतिबाट समाधान गर्न आग्रह गरेका छन्।
शनिबार कांग्रेसले आयोजना गरेको ‘ग्रिन रन’का क्रममा सञ्चारकर्मीसँग कुरा गर्दै शर्माले कांग्रेस नयाँ सोच, दृष्टिकोण र ऊर्जासहित अघि बढिरहेको भन्दै संस्थापनइतर समूहका नेताहरूलाई समेत संवादमार्फत पार्टीलाई एकताबद्ध बनाउन आग्रह गरे।
‘अदालतको ढोकाबाट होइन, पार्टी कार्यालयको कोठाबाट हामी सँगसँगै बसेर संवाद गरेर पार्टीलाई एकताबद्ध बनाएर लिएर जानुछ,’ उनले भने।
संविधान र कानुनले मुद्दा मामिलाको बाटो खुला गरे पनि त्यसबाट मात्रै पार्टीभित्रको राजनीतिक विवाद समाधान नहुने उनको भनाइ थियो। संवाद र सहमतिबाट विवाद टुंग्याएर पार्टीलाई एकताबद्ध बनाउनु अहिलेको आवश्यकता रहेको उनले बताए।
विशेष महाधिवेशनबाट आएको नेतृत्व पाँच वर्षका लागि कायम नरहने भन्दै शर्माले आगामी असोजमा महाधिवेशन हुने र नेतृत्वमा प्रतिस्पर्धा गर्न सबैलाई अवसर खुला रहेको बताए। ‘कसले आएर सभापति बन्न चाहनुहुन्छ, को आएर उपसभापति, महामन्त्री बन्न चाहनुहुन्छ, सबैलाई ढोका खुला छ,’ उनले भने।
कांग्रेसको विशेष महाधिवेशनको वैधानिक प्रक्रियालाई लिएर पार्टीभित्र विवाद छ। उक्त विवाद अदालतसम्म पुगेको छ। संस्थापनइतर समूहले संस्थापन पक्षले घोषणा गरेको असोजको महाधिवेशन रोक्न अदालत जाने तयारी गरिरहेको छ।
