काठमाडौँ । सूचना तथा सञ्चारमन्त्री डा. विक्रम तिमिल्सिनाले कतार र इस्टोनियाका समकक्षीसँग सूचना तथा सञ्चार प्रविधिको क्षेत्रमा द्विपक्षीय सहकार्य विस्तार गर्ने विषयमा छलफल गरेका छन् ।
अन्तर्राष्ट्रिय दूरसञ्चार संघ (आइटियु) को सन् २०२६ को महासम्मेलन (आइटियु पीपी–२६) मा सहभागी हुन कतारको दोहा पुगेका मन्त्री तिमिल्सिनाले कतारका सञ्चार तथा सूचना प्रविधिमन्त्री मोहम्मद बिन अली अल मन्नाईसँग द्विपक्षीय भेटवार्ता गरेका हुन् ।
नेपाली राजदूतावास, दोहाले बिहीबार जारी गरेको प्रेस विज्ञप्तिअनुसार दोहा एक्जिबिसन एन्ड कन्भेन्सन सेन्टरमा आयोजित सम्मेलनका क्रममा भएको भेटमा दुई देशबीच सूचना तथा सञ्चार प्रविधिका क्षेत्रमा सहकार्यका सम्भावना र अवसर विस्तार गर्ने विषयमा छलफल भएको थियो ।
सो अवसरमा मन्त्री तिमिल्सिनाले गत अगस्ट २६ मा भोटेकोशी नदीमा आएको विनाशकारी बाढीबाट प्रभावित नेपाली नागरिकका लागि राहत सामग्री उपलब्ध गराएकोमा कतार सरकारप्रति आभार व्यक्त गरे ।
उनले सन् २०२४ अप्रिलमा कतारका अमिर शेख तमिम बिन हमाद अल थानीले गरेको नेपालको राजकीय भ्रमणको स्मरण गर्दै नेपाल र कतारबीचको मैत्रीपूर्ण सम्बन्ध तथा दीर्घकालीन मित्रताको चर्चा गरे । साथै, दुई देशबीच कूटनीतिक सम्बन्ध स्थापना भएको ५०औँ वार्षिकोत्सव नजिकिँदै गरेकोमा खुसी व्यक्त गरे ।
नेपालजस्तो भौगोलिक विविधता भएको मुलुकका लागि दूरसञ्चार क्षेत्रको महत्त्व औँल्याउँदै उनले यस क्षेत्रमा कतारले हासिल गरेको प्रगतिको प्रशंसासमेत गरे ।
यसैगरी, मन्त्री तिमिल्सिनाले इस्टोनियाका न्याय तथा डिजिटल मामिलामन्त्री लिसा–लि पाकोस्टासँग पनि छुट्टै द्विपक्षीय भेटवार्ता गरेका छन् ।
भेटमा उनले प्रविधि विकास र डिजिटल रूपान्तरणका क्षेत्रमा इस्टोनियाले हासिल गरेको उपलब्धि तथा अनुभव नेपालका लागि उपयोगी हुने बताए । दुवै पक्षले दूरसञ्चारलगायत सूचना तथा सञ्चार प्रविधिका क्षेत्रमा सहकार्य गर्न सकिने सम्भावित क्षेत्र पहिचान गर्ने विषयमा विचार आदानप्रदान गरेका थिए ।
आइटियु पीपी–२६ सम्मेलनका क्रममा विभिन्न द्विपक्षीय भेटवार्ता तथा महत्त्वपूर्ण कार्यक्रममा सहभागी भएका मन्त्री तिमिल्सिना आज राति दोहाबाट काठमाडौँ फर्कने कार्यक्रम रहेको नेपाली राजदूतावास, दोहाले जनाएको छ ।
