हुम्ला। नेपाल टेलिकमका टावरमा जोडिएका लिङ्क डिभाइसमा समस्या आएपछि हुम्ला र मुगुका विभिन्न बस्तीमा एक सातादेखि इन्टरनेट तथा टेलिफोन सेवा प्रभावित भएको छ।
मुगुको रुघा र सोरु गाउँपालिकाको नाथर्पुस्थित फोरजी टावरमा प्राविधिक समस्या देखिएको हो। नेपाल टेलिकम मुगुका प्रमुख उमेश चौधरीले दसैँ बिदामा कर्मचारी घर गएकाले सेवा तत्काल सञ्चालन गर्न नसकिने बताए। उनका अनुसार दसैँपछि मात्रै टावरको मर्मत गरिनेछ।
सेवा अवरुद्ध हुँदा मुगुको सोरु गाउँपालिकासहित हुम्लाका अदानचुली, ताँजाकोट, सर्केगाड र चङ्खेली गाउँपालिकाका अधिकांश बस्ती प्रभावित भएका छन्।
अदानचुली गाउँपालिका–४ का वडासदस्य सिंह बोहराले समस्या समाधानका लागि टेलिकमका कर्मचारीलाई पटकपटक आग्रह गरे पनि सेवा सञ्चालन हुन नसकेको बताए। सञ्चार सेवा अवरुद्ध हुँदा दसैँमा आउजाउ गर्ने आफन्तसँग सम्पर्क गर्न र रकम पठाउनसमेत समस्या भएको उनको भनाइ छ।
भौगोलिक विकटताका कारण वैकल्पिक सञ्चार माध्यमको पहुँचसमेत सहज नभएका यी क्षेत्रका बासिन्दा टेलिकमको सेवा अवरुद्ध हुँदा थप समस्यामा परेका छन्।
