चीन। कृत्रिम बौद्धिकता (एआई) को विकास, सुरक्षा र नियमनका लागि विश्वव्यापी सहकार्य आवश्यक रहेकोमा चीनमा आयोजित विश्व इन्टरनेट सम्मेलनका सहभागीले जोड दिएका छन्।
चीनको पूर्वी झेजियाङ प्रान्तस्थित वुझेनमा मंगलबारदेखि सुरु भएको सन् २०२६ को विश्व इन्टरनेट सम्मेलन (डब्लूआईसी) वुझेन शिखर सम्मेलनमा सहभागी प्रतिनिधिले खुला प्रविधि, डिजिटल साझेदारी र सामूहिक नवप्रवर्तनको आवश्यकतामा जोड दिएका हुन्।
‘खुला स्रोत र खुलापन, संयुक्त योगदान र साझा लाभ : साइबर स्पेसमा साझा भविष्यको समुदाय निर्माण’ नारासहित आयोजित सम्मेलनमा १३८ देश तथा क्षेत्रका करिब एक हजार ८०० प्रतिनिधि सहभागी छन्।
सम्मेलनमा जीएसएमए लिमिटेडका अध्यक्ष तथा निर्देशक जोन हफम्यानले खुला प्रविधि र खुला स्रोत क्षमताको विकासमा चीनले महत्त्वपूर्ण भूमिका खेलिरहेको बताए। विश्वव्यापीकरण तथा ठूलो परिमाणमा उत्पादन र प्रविधिको प्रयोगले औद्योगिक विकासलाई गति दिनुका साथै लागत घटाउन सहयोग पुगेको उनको भनाइ थियो। मोबाइल प्रविधिका विभिन्न पुस्ताको विकासले विश्वलाई एउटै प्रविधिगत प्रणालीमा जोड्न सम्भव भएको उनले उल्लेख गरे।
त्यस्तै, यूक्लाउड टेक्नोलोजीका संस्थापक तथा प्रमुख कार्यकारी अधिकृत जी सिन्ह्वाले एआईको तीव्र विकाससँगै यसको सुरक्षा, नियमन र व्यवस्थापन प्रमुख चुनौतीका रूपमा देखिएको बताए। मानव बुद्धिमत्ता र कृत्रिम बुद्धिमत्ताबीच सहकार्य तथा सहअस्तित्व कायम गर्ने विषयमा गम्भीर विमर्श आवश्यक रहेको उनको भनाइ थियो।
एआईलाई सुरक्षित र प्रभावकारी बनाउन सामूहिक सहकार्य आवश्यक रहेको उल्लेख गर्दै उनले यससम्बन्धी कानुन तथा नियम निर्माण र दीर्घकालीन योजनामा जोड दिए।
सम्मेलनमा खुला स्रोत प्रविधि, डिजिटल सहकार्य, एआई सुरक्षा तथा साइबर स्पेसको भविष्यलगायत विषयमा छलफल भइरहेको छ।
