काठमाडौँ– नेपाल प्रिमियर लिग (एनपीएल) अन्तर्गत आज बिहीबार दुई खेल हुँदैछन्। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा हुने दुवै खेलमा चार टोली प्रतिस्पर्धामा उत्रनेछन्।
आजको पहिलो खेलमा दिउँसो १२ः३० बजे लुम्बिनी लायन्स र जनकपुर बोल्ट्सबीच प्रतिस्पर्धा हुनेछ।
लुम्बिनी लायन्स तीन खेलबाट दुई जित र एक बराबरीसहित पाँच अङ्क जोडेर तालिकाको शीर्ष स्थानमा छ। अपराजित रहेको लुम्बिनी आजको खेल जित्दै आफ्नो अग्रता थप बलियो बनाउने लक्ष्यमा हुनेछ।
यता जनकपुर बोल्ट्सले चार खेलबाट दुई जित र दुई हारसहित चार अङ्क जोडेको छ। तालिकाको चौथो स्थानमा रहेको जनकपुर आज तेस्रो जित निकाल्ने लक्ष्यसहित मैदान उत्रनेछ। समान चार अङ्क भएका कर्णाली याक्स र विराटनगर किंग्स रनरेटका आधारमा जनकपुरभन्दा अगाडि छन्।
त्यस्तै, आजै साँझ ५ बजे हुने दोस्रो खेलमा काठमाडौँ गोर्खाज र विराटनगर किंग्स आमनेसामने हुनेछन्।
दुई खेल खेलेको काठमाडौँले एक जित र एक हार बेहोर्दै दुई अङ्क जोडेको छ। तालिकाको पुछारबाट दोस्रो स्थानमा रहेको काठमाडौँलाई आजको खेल जित्दै आफ्नो स्थिति सुधार्ने अवसर छ।
चार खेलबाट दुई जित र दुई हार बेहोरेको विराटनगर किंग्स चार अङ्कसहित तालिकाको दोस्रो स्थानमा छ। सन्दीप लामिछानेको कप्तानीमा रहेको विराटनगर आज तेस्रो जित निकाल्दै शीर्ष स्थानतर्फ उक्लिने लक्ष्यमा हुनेछ।
