काठमाडौँ । परराष्ट्र मन्त्री शिशिर खनालले नेपाल-भारतबीच सीमासम्बन्धी अधिकांश प्राविधिक कार्य सम्पन्न भइसकेको उल्लेख गर्दै बाँकी रहेका विवादित क्षेत्रका विषय पनि द्विपक्षीय कूटनीतिक संवादमार्फत समाधान गर्ने सरकारको नीति रहेको बताएका छन्।
बुधबार राष्ट्रिय सभामा सांसदहरूले उठाएका प्रश्नको जवाफ दिने क्रममा मन्त्री खनालले लिम्पियाधुरा, लिपुलेक, कालापानी तथा सुस्ता क्षेत्रमा भने दुवै देशका प्राविधिक टोलीबाट हालसम्म सीमांकन सम्पन्न नभएको बताए।
उनले ती भू-भाग नेपालको अभिन्न हिस्सा रहेको सरकारको धारणा पुनः दोहोर्याउँदै त्यसका पक्षमा ऐतिहासिक दस्तावेज, प्रमाण तथा नक्सा उपलब्ध रहेको उल्लेख गरे।
मन्त्री खनालका अनुसार उल्लिखित क्षेत्रबाहेक अन्य स्थानमा सीमा नापजाँचसँग सम्बन्धित द्विपक्षीय प्राविधिक संयन्त्रले कामलाई निरन्तरता दिइरहेको छ।
उनले नेपालसँग रहेका ऐतिहासिक तथ्य र प्रमाणका आधारमा भारतसँग देखिएका मतभेद कूटनीतिक माध्यमबाट टुंग्याउने प्रयास भइरहेको जानकारी दिए। यस विषयमा भारतीय समकक्षीसँगको भेटवार्ताका क्रममा पनि नेपालको धारणा स्पष्ट रूपमा राखिएको उनले बताए।
मन्त्री खनालले नेपाल र भारतबीच केही विषयमा दृष्टिकोण फरक हुनु अस्वाभाविक नभए पनि त्यसको समाधान ऐतिहासिक प्रमाण र आपसी संवादका आधारमा खोजिनुपर्ने सरकारको प्रतिबद्धता रहेको स्पष्ट पारेका छन्।
