चितवन। राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले राष्ट्रिय स्वतन्त्र पार्टी (रास्वपा) लाई मत दिनेमा राजतन्त्रवादीहरू समेत रहेको दाबी गरेका छन्।
चितवनको भरतपुरमा आइतबार आयोजित रास्वपाको पहिलो ऐतिहासिक राष्ट्रिय महाधिवेशनलाई सम्बोधन गर्दै उनले रास्वपाले पाएको जनविश्वास कुनै एउटा विचारमा मात्र सीमित नरहेको बताए।
अध्यक्ष लिङ्देनले रास्वपालाई विभिन्न विचार र पृष्ठभूमिका जनताले परिवर्तनको आशमा मतदान गरेको उल्लेख गर्दै सुनाए, ‘नेपालमा राजा चाहिन्छ भन्नेहरूले पनि रास्वपालाई मत दिएका छन्। यो केवल एउटा दलको सफलता मात्र होइन, नागरिकको छटपटीको अभिव्यक्ति हो।’
उनले रास्वपाले देश बनाउने अभूतपूर्व अवसर पाएको र यसलाई सदुपयोग गर्नुपर्नेमा जोड दिए।
सम्बोधनका क्रममा उनले नेतृत्वलाई सचेत गराउँदै भने, ‘यदि तपाईंहरू यो अवसरमा चुक्नुभयो भने त्यो धोका केवल पार्टी वा नेतृत्वलाई मात्र हुने छैन, सिङ्गो देश र भविष्यप्रति ठूलो घात हुनेछ।’
उनले जनताको आशालाई निराशामा परिणत हुन नदिन र प्राप्त जनविश्वासलाई मर्न नदिन नेतृत्वलाई आग्रह गरे। मुलुकका सबै जिल्ला र वडाहरूमा संगठन समेत विस्तार नभएको अवस्थामा पनि जनताले रास्वपालाई पत्याएको प्रसङ्ग जोड्दै अध्यक्ष लिङ्देनले यसलाई गम्भीरतापूर्वक लिनुपर्ने बताए।
‘जहाँ संगठन छैन, त्यहाँ पनि जनताले तपाईंहरूलाई विश्वास गरेका छन्,’ उनले भने, ‘यो विश्वासको भारलाई बुझेर जिम्मेवारीपूर्वक अगाडि बढ्नुहोला।’
