काँकडभिट्टा (झापा), २७ असोज । पूर्वपश्चिम राजमार्ग अन्तरगत झापाको मेचीनगर-७ इट्टाभट्टामा आज बिहान भएको सडक दुर्घटनामा एक व्यक्तिको निधन भएको छ ।
आज बिहान ७:३० बजे मेचीनगर-७ इटाभट्टामा धुलाबारीबाट काँकरभिट्टातर्फ जाँदै गरेको प्र ०१-१७ प ७४४ नम्बरको मोटरसाइकलले विपरित दिशाबाट आउँदै गरेका साइकल यात्रीलाई ठक्कर दिएको थियो ।
होटल मेची क्राउनमा काम गर्ने ३५ वर्षका अविशेक लिम्बुले चलाएको उक्त मोटरसाइकलको ठक्करबाट साइकलयात्री सगरमाथा यातायातका चालक अन्दाजी ४५ वर्षका डिकेन राजवंशीलाई गम्भिर घाइते भएका थिए ।
घाइते राजवंशीलाई उपचारका लागि बीएण्डसी अस्पताल बिर्तामोड लगिएकोमा चिकित्सकले मृत घोषित गरेको जिल्ला प्रहरी कार्यालय झापाका प्रवक्ता डिएसपी कृष्ण कुमार चन्दले केटिएम दैनिकलाई बताए ।
दुर्घटनापछि मृतकका आफन्त र यातायात व्यवसायी संघका कर्मचारीहरुले केही समय पूर्वपश्चिम राजमार्ग अवरुद्ध गरेका थिए ।
पीडित पक्षसँगको वार्तापछि अहिले यातायात सुचारु भएको प्रहरीले जनाएको छ ।
