मुस्ताङ– ‘अर्नब’ चक्रवातको प्रभावले उपल्लो मुस्ताङमा भारी हिमपात र तल्लो क्षेत्रमा निरन्तर वर्षा भएपछि जनजीवन प्रभावित भएको छ।
शुक्रबार रातिदेखि लोमान्थाङ र लोघेकर दामोदरकुण्ड गाउँपालिकाका विभिन्न क्षेत्रमा बाक्लो हिमपात भइरहेको प्रमुख जिल्ला अधिकारी परशुराम पोखरेलले जानकारी दिएका छन्। त्यस्तै, वारागुङ मुक्तिक्षेत्र गाउँपालिका–३ छुसाङदेखि तल्लो भेगमा लगातार वर्षा भइरहेको छ। स्थानीय तहका अनुसार कात्तिक महिनामा यस वर्ष पहिलोपटक यति ठूलो मात्रामा हिमपात भएको हो।
नेपाल–चीन सीमामा रहेको कोरला नाका तथा आसपासका क्षेत्रमा दुईदेखि तीन फिटसम्म हिउँ जमेको लोमान्थाङ गाउँपालिका–४ न्हेचुङस्थित सशस्त्र प्रहरी बलको बोर्डर आउट पोस्ट (बीओपी) ले जनाएको छ।
बीओपी प्रमुख सशस्त्र प्रहरी निरीक्षक प्रकाश धितालका अनुसार प्रतिकूल मौसमका कारण कोरलातर्फको सडकमा सवारीसाधन तथा पर्यटकको आवागमन रोकिएको छ। भन्सार जाँचपास भइसकेका कन्टेनर र विद्युतीय सवारीसाधनलाई समेत न्हेचुङबाट अगाडि नबढ्न आग्रह गरिएको छ। मौसममा सुधार नआएसम्म सीमा व्यापार तथा निकासी–पैठारीसमेत बन्द गरिएको छ।
वर्षा र हिमपातका कारण जोमसोम–कोरला सडकखण्ड पूर्ण रूपमा अवरुद्ध भएको छ। घरपझोङ गाउँपालिका–४ जोमसोमतर्फ पर्यटक चेकपोस्टभन्दा अगाडि तथा वारागुङ मुक्तिक्षेत्र गाउँपालिका–३ छुसाङमा पहिरो खसेपछि यातायात सेवा ठप्प भएको जिल्ला प्रहरी कार्यालयका सूचना अधिकारी ईश्वर महतले जानकारी दिएका छन्।
अत्यधिक चिसो र निरन्तर हिमपातका कारण उपल्लो मुस्ताङका बस्ती, खर्क, पाटन तथा उच्च लेकाली क्षेत्र हिउँले ढाकिएका छन्।
प्रतिकूल मौसमका कारण पर्यटक, स्थानीय बासिन्दा तथा ढुवानीमा संलग्न चालकहरूलाई सतर्कता अपनाउन र अनावश्यक यात्रा नगर्न प्रशासनले आग्रह गरेको छ।
