काठमाडौं । भोटेकोशी तथा कालीगण्डकी करिडोरमा आएको बाढीपहिरोपछिको खोजी तथा उद्धारका क्रममा हालसम्म ११२ जनाको शव पहिचान गरी परिवारलाई बुझाइएको नेपाल प्रहरीले जनाएको छ।
नदीले बगाएर टाढा पुर्याएका शवको खोजीका लागि रसुवाको टिमुरेदेखि नवलपरासीको त्रिवेणीसम्म नदीका दुवै किनारमा ‘टिमुरे टु त्रिवेणी’ (टी टु टी) विशेष अभियान सञ्चालन गरिएको प्रहरीले जनाएको छ।
भोटेकोशी एवं कालीगण्डकी करिडोर विपद्सम्बन्धी अध्ययन तथा अनुगमन संसदीय विशेष समितिको शुक्रबारको बैठकमा प्रहरीका तर्फबाट कार्यप्रगति विवरण प्रस्तुत गर्दै प्रहरी उपरीक्षक (एसपी) गोविन्द पुरीले उक्त जानकारी दिएका हुन्।
उनका अनुसार विपद् सुरु भएलगत्तै प्रहरी प्रधान कार्यालयमा चौबिसै घण्टा सञ्चालन हुने गरी ‘विपद् उद्धार तथा समन्वय सूचना व्यवस्थापन केन्द्र’ स्थापना गरिएको थियो। बाढीबाट आठ जिल्लाका २६ स्थानीय तह प्रभावित भएकामा सरकारले १५ स्थानीय तहलाई विपद् संकटग्रस्त क्षेत्र घोषणा गरेको छ। प्रभावित क्षेत्रमा हालसम्म एक हजार ४७६ प्रहरी परिचालन गरिएको छ भने खोजी कार्यमा तालिमप्राप्त कुकुरसमेत प्रयोग गरिएको छ।
विपद्का सुरुवाती क्षणमा प्रहरीका छवटा युनिटमा क्षति पुग्नुका साथै सञ्चार सम्पर्क विच्छेद भएको थियो। त्यसका बाबजुद उद्धार तथा खोजी कार्यलाई तीव्रता दिइएको प्रहरीले जनाएको छ।
शवको पहिचान र व्यवस्थापनलाई सहज बनाउन प्रहरीले फेला परेका सबै शवको तस्बिरसहितको विवरण वेबसाइटमा राखेको छ। यसबाट देश तथा विदेशमा रहेका आफन्तलाई शव पहिचान गर्न सहज भएको प्रहरीको भनाइ छ। यस्तै, डीएनए प्रोफाइलिङ, फरेन्सिक परीक्षण तथा कानुनी प्रक्रिया सहजीकरणका लागि वरिष्ठ प्रहरी उपरीक्षक (एसएसपी) को नेतृत्वमा विशेष टोली परिचालन गरिएको छ।
काठमाडौंस्थित त्रिवि शिक्षण अस्पतालमा शव तथा घाइतेको व्यवस्थापनका लागि मात्रै ५१ प्रहरी खटाइएको थियो। नेपाली सेना, सशस्त्र प्रहरी बल र राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग समन्वय गरी तथ्यांक प्रमाणीकरण तथा उद्धार कार्य अघि बढाइएको पुरीले बताए।
भौगोलिक विकटता र नदीको तीव्र बहावका कारण अझै केही व्यक्ति बेपत्ता रहेको र उनीहरूको वास्तविक संख्या यकिन गर्ने काम भइरहेको प्रहरीले जनाएको छ।
