काठमाडौँ, १० भाद्र । नेपालको लोकप्रिय ब्राण्ड सिद्धार्थ हस्पिटालिटीको ‘तीज यात्रा’ सफलतापूर्वक सम्पन्न भएको छ । नेपाली महिलाहरूको महान् पर्व तीजका अवसरमा महिलालाई सम्मान तथा दर खुवाउने उद्देश्यले आयोजित यात्रा भव्यरुपमा सम्पन्न भएको कम्पनीले जनाएको छ ।
समाजका विभिन्न क्षेत्रमा क्रियाशील महिलालाई भेला पारी कम्पनीले तीज यात्रा आयोजना गरेको कम्पनीका बिजनेस डेभलपमेन्ट डाइरेक्टर दुर्गादत्त पन्तले जानकारी दिए ।
उनका अनुसार यात्रा भदौ ४ गते बुटवलको सिद्धार्थ कटेजबाट सुरु भएको थियो । यात्रा भदौ ५ गते भैरहवाको सिद्धार्थ भिलासा, भदौ ६ गते सिद्धार्थ होटेल, टीकापुर र भदौ ८ गते सिद्धार्थ कटेज नेपालगञ्जमा आयोजना भएको थियो ।
तीज यात्राभर गायिका मञ्जु पौडेलसहित स्थानीय कलाकारहरूले विशेष प्रस्तुति दिएका थिए । चार स्थानमा गरिएको कार्यक्रममा गरी एक हजारभन्दा बढी महिला उपस्थित थिए ।
“विभिन्न क्षेत्रमा सक्रिय र सम्मानित महिलालाई निमन्त्रणा गरी कार्यक्रम आयोजना गरिएको थियो, तीजका अवसरमा यो कम्पनीका तर्फबाट गरिएको सम्मान थियो”, पन्तले भने ।
सिद्धार्थ हस्पिटालिटी अन्तर्गत पाँच तारे स्तरमा सिद्धार्थ भिलासा, चार तारे स्तरमा सिद्धार्थ वैभव र तीन तारे स्तरमा सिद्धार्थ बाटिका ब्राण्ड सञ्चालित छन् । साथै हस्पिटालिटी एजुकेसन, रेस्टुरेन्ट, कटेज, क्याफे, कृषि फार्म, ट्रेकिङ आइटीलगायत दुई दर्जनभन्दा बढी कम्पनी सञ्चालनमा रहेका छन् ।
