काठमाडौं । उद्योग, वाणिज्य तथा आपूर्तिमन्त्री दीपककुमार साहले आयात बढाएर नभई स्वदेशी उत्पादन र उत्पादकत्व वृद्धि गरेर मात्र नेपालको समृद्धि सम्भव हुने बताएका छन् ।
नेपाल कृषि मेसिनरी व्यवसायी संघले राजधानीमा आयोजना गरेको अन्तर्राष्ट्रियस्तरको कृषि यान्त्रीकरण प्रदर्शनीलाई सम्बोधन गर्दै मन्त्री साहले आर्थिक वर्ष २०८२/८३ मा खाद्य तथा कृषि समूहका वस्तुको आयात करिब ४ खर्ब ४१ अर्ब रुपैयाँ पुगेको भन्सार विभागको तथ्यांकले स्वदेशी उत्पादन बढाउनुपर्ने आवश्यकता औँल्याएको बताए ।
उनले उक्त आयातमा खाद्य वस्तुका अतिरिक्त कच्चा खाद्य तेल, पशुआहार तथा पशुधनका लागि आयात गरिएका सामग्रीसमेत समावेश हुन सक्ने भएकाले त्यसलाई खाद्यान्नको आयात मात्रै भन्न नमिल्ने स्पष्ट पारे । यद्यपि, धान, चामल, तरकारी र फलफूललगायत कृषि उपजको उत्पादन तथा उत्पादकत्व बढाएर आयात प्रतिस्थापन गर्ने ठूलो सम्भावना रहेको उनको भनाइ थियो ।
मन्त्री साहले किसानलाई भाषण र आश्वासनभन्दा उत्पादन बढाउने प्रविधि, आधुनिक उपकरण र आवश्यक साधन उपलब्ध गराउनुपर्नेमा जोड दिए। परम्परागत खेती प्रणालीलाई आधुनिक, व्यावसायिक र प्रविधिमैत्री बनाउनु आवश्यक रहेको उल्लेख गर्दै उनले कृषि यान्त्रीकरणलाई त्यसको महत्त्वपूर्ण आधारका रूपमा व्याख्या गरे ।
‘नेपालको समृद्धि आयात बढाएर होइन, स्वदेशी उत्पादन बढाएर सम्भव छ,’ उनले भने, ‘किसानलाई भाषण होइन, प्रविधि चाहिएको छ । आश्वासन होइन, उत्पादन बढाउने साधन चाहिएको छ ।’
नेपाल कृषि मेसिनरी व्यवसायी संघका सदस्यहरू कृषि उपकरणका व्यापारी मात्र नभई कृषि रूपान्तरणका अभियन्तासमेत भएको उनले बताए । कृषि क्षेत्रको आधुनिकीकरण र यान्त्रीकरणमा निजी क्षेत्रको योगदान महत्त्वपूर्ण रहेको उनको भनाइ थियो ।
स्वदेशी कृषि उत्पादन वृद्धि, आयात प्रतिस्थापन र कृषिलाई प्रतिस्पर्धी तथा उत्पादनमुखी बनाउन सरकार, किसान र निजी क्षेत्रबीच सहकार्य आवश्यक रहेको मन्त्री साहले बताए ।