एजेन्सी, ७ भाद्र । बलिवुड फिल्म स्त्री-२ ले भारतीय बक्स अफिसमा शानदार कमाई गरिरहेको छ । फिल्मले रिलिजको आठौँ दिन बिहीबार मात्र १८ करोड २० लाख कमाई गरेको छ ।
फिल्म विश्लेषक तरण आदर्शका अनुसार फिल्मले अहिलेसम्म ३०७ करोड ८० लाख कमाई गरिसकेको छ । योसँगै फिल्म रिलिजको आठौँ दिन तीन सय करोड क्लबमा पुगेको छ ।
यसअघि फिल्म जवान छैटौँ दिन, पठान र एनिमल सातौँ दिन तीन करोड क्लबमा पुगेका थिए भने गदर-२ पनि आठौँ दिनमा तीन सय करोड क्लबमा पुगेको थियो ।
फिल्मले रिलिजको पहिलो दिन बिहीबार ५५ करोड ४० लाख कमाई गरेको थियो । त्यस्तै फिल्मले बुधवार पेड रिभ्यु र प्रिमियमबाट ९.४० करोड कमाई गरेको थियो ।
त्यस्तै फिल्मले शुक्रवार ३५.३० करोड, शनिवार ४५ करोड ७० लाख, आइतबार ५८ करोड २० लाख, सोमबार ३८ करोड ९० लाख, मङ्गलवार २६ करोड ८० लाख र बुधवार २० करोड ४० लाख कमाएको थियो ।
करिब ५० करोडको लागतमा बनेको यो फिल्मले पहिलो दिनमा नै आफ्नो लागत उठाएको छ । यसअघि बनेको स्त्रीले आफ्नो पहिलो सातामा ६० करोड ३९ लाख कमाई गरेको थियो, जबकि स्त्री-२ ले पहिलो दिनमा नै सो अङ्कलाई पछाडि पारेको थियो ।
अमर कौशिकले निर्देशन गरेको स्त्री-२ मा श्रद्धा कपूर, राजकुमार राव, पंकज त्रिपाठी, अभिषेक बेनर्जीलगायतको अभिनय रहेको छ ।
