दाङ । दाङमा एक ७३ बर्सिया वृद्धामाथि सामूहिक बलात्कार गरिएको छ ।
जिल्लाको तुलसीपुर उपमहानगरपालिका-५ बसपार्कस्थित पार्किङ गरी राखेको ना.४ ख ७८४८ नम्बरको गाडीभित्र ती वृद्धालाई बुधवार राती जबरजस्ती करणी गरेको प्रहरीले जनाएको छ ।
वृद्ध महिलालाई सामूहिक बलात्कार गरेको अभियोगमा प्रहरीले दुई जनालाई पक्राउ गरेको छ ।
पक्राउ पर्नेमा तुलसीपुर उपमहानगरपालिका-१५ बस्ने ३० वर्षीय पुष्कर रोका र सल्यान कुमाख गाउँपालिका-७ बस्ने २० वर्षीय रेशम बिक रहेको जिल्ला प्रहरी कार्यालय दाङले जनाएको छ ।
उनीहरूलाई बिहीबार साँझ अस्थायी प्रहरी पोस्ट तुलसीपुर बसपार्क र इलाका प्रहरी कार्यालय तुलसीपुरबाट खटिएको प्रहरीले पक्राउ गरेको हो ।
कानुनमा के छ ?
नेपालको कानुनले कुनै महिलालाई उनको मन्जुरी नलिई करणी गरेमा वा मन्जुरी लिएर पनि पनि अठार वर्षभन्दा कम उमेरको कुनै बालिकालाई करणी गरेमा त्यसलाई जवरजस्ती करणी गरेको मान्छ ।
जवरजस्ती करणी गर्ने व्यक्तिलाई त्यसरी करणी गर्दाको परिस्थिति र महिलाको उमे हेरेर विभिन्न कैद सजाय हुने मुलुकी अपराध संहिता २०७४ को दफा २१९ मा उल्लेख छ ।
सोही दफाको उपदफा ३ (क) बमोजिम सत्तरी वर्षभन्दा बढी उमेरका महिलालाई बलात्कार गर्नेलाई जन्मकैद हुने उल्लेख छ । यो घटनामा वृद्ध महिलामाथि सामूहिक करणी भएको हुनाले थप पाँच वर्षसम्म कैद हुने सोही दफाको उपदफा ७ मा उल्लेख छ ।
