मोरङमा बलात्कारपछि हत्या गरिएकी १८ महिने नाबालिकाको परिवारलाई ‘श्रीमती संगठन’ नामक समुहले आर्थिक सहयोग गरेको छ ।
फाल्गुन २७ गते मोरङ सुन्दरहरैँचा नगरपालिका–७ गणेशपुरकी १८ महिने नाबालिकालाई करणीपछि हत्या प्रयास गरिएकोमा अस्पतालमा ती बालिकाले ज्यान गुमाएकी थिइन् ।
प्रहरीले हत्यामा संलग्न भएको आरोपमा सोही स्थानका २५ वर्षीय अजय चौधरी र २८ वर्षीय मिथुन चौधरीलाई पक्राउ गरेको छ । घटनामा संलग्न दुवै दाजु–भाइ हुन् ।
फेसबुकबाट संगठित भएका विवाहित महिलाहरूले खोलेको गुप्रमा भएका सदस्यहरूले पैसा उठाएर पीडित परिवारलाई सहयोग गरेको हो । उनीहरूले सामाजिक सञ्जलमार्फत उठाएको ७७ हजार ७३५ रुपैयाँ पीडित परिवारलाई हस्तान्तरण गरेका हुन् ।
देशभरमा छरिएर रहेका विवाहित महिलाहरूको समूहलले इसेवा तथा बैंक मार्फत रकम जम्मा गरेका थिए । उक्त रकम आज (मंगलबार) पीडितको घरमा पुगेर हस्तान्तरण गरिएको संस्थापक रेवती न्यौपाने बस्नेतले केटिएम दैनिकलाई बताइन् ।
रकम हस्तान्तरण गर्न पुगेकी अर्की संस्थापक जुना घिमिरे भन्छिन् “यो घटनाले हामीलाई निकै स्तव्ध बनायो । पीडित परिवारलाई काजकिरिया गर्न पनि आर्थिक अभाव भएको समाचार सुनेपछि हामीले सहयोग जुटाएका हौं । यसमा हाम्रो ग्रुपमा रहनुभएका धेरैले साथ दिनुभएको छ ।”
यो संस्थाले यसअगाडि पनि विभिन्न सहयोग गर्दै आएको छ ।
१८ महिने बालिकाको बलात्कारपछि हत्या प्रकरणमा केटिएम दैनिकमा प्रकाशित समाचारहरू
- १८ महिने बालिकाको न्याय माग्दै माइतिघरमा प्रदर्शन (फोटो/ भिडिओ)
- १८ महिने बालिका बलात्कारपछि हत्या प्रकरण : आमा अझै बेहोस, बुबाको रोदन–‘हाम्रो बाँच्ने आधार नै गुम्यो’
- गाँजा सेवन गरेर १८ महिने बालिकालाई बलात्कार, बालिका रुएपछि बोत्तल र ढुङ्गा प्रहार !
- १८ महिने बालिकाको मृत्यु प्रकरण : बलात्कारको आशङ्कामा सोही स्थानका दुई युवक पक्राउ
