काठमाडौं । झापाबाट १७ वर्षीया किशोरीलाई भगाएर खोटाङ पुर्याएर एक हप्ता राखेका युवक बलात्कारको आरोपमा पक्राउ परेका छन् ।
झापाको बाह्रदर्शी गाउँपालिका-२ स्थायी घर भएका २० वर्षका अजय शर्मा खत्वे केही समयदेखि खोटाङको एक ग्यारेजमा काम गर्दै आइरहेका थिए ।
प्रेम सम्बन्धमा रहेकी गाउँकै एक १७ वर्षीया किशोरीलाई लिएर यही असोज १० गते उनी खोटाङको दिक्तेल पुगे । दुवैजना त्यहाँ एक हप्तासम्म बसे ।
खोटाङको दिक्तेलमा एक हप्ता बसेपछि झापा फर्कने क्रममा जिल्ला प्रहरी कार्यालय झापाले युवकलाई पक्राउ गर्यो ।
झापा प्रहरी प्रवक्ता डिएसपी खगेन्द्र प्रसाद रिजालले केटिएम दैनिकसँग भने, ‘हामीकहाँ किशोरीको आफन्तले जाहेरी दिनुभएको थियो । उनीहरू घर आएको थाहा पाएपछि प्रहरीले अनुसन्धानको लागि युवकलाई नियन्त्रणमा लिएको हो ।’
घटना खोटाङमा भएको हुनाले उनलाई खोटाङ पठाइएको डिएसी रिजालले जानकारी दिए ।
जिल्ला प्रहरी कार्यालय खोटाङका सूचना अधिकारी प्रहरी निरीक्षक टिका बरालले युवकलाई खोटाङ ल्याइएको पुष्टि गरे ।
दुवैजनाको राजीखुशीमा भागेर गएतापनि नेपालको कानुनले किशोरी नाबालिका भएको हुँदा उनले दिएको सहमतिलाई इन्कार गर्दछ ।
मुलुकी अपराध संहिता २०७४ को दफा २१९ ले १८ वर्षभन्दा कम उमेरका किशोरी/बालिकासँग मञ्जुरी लिएर शारिरीक सम्बन्ध राखेतापनि उक्त सम्बन्धलाई जबरजस्ती करणी ठहर गर्दै पीडितको उमेर र परिस्थिति हेरेर विभिन्न सजाय निर्धारण गर्दछ ।
प्रहरी निरीक्षक बरालका अनुसार युवकमाथि करणी सम्बन्धी कसूरमा अनुसन्धान जारी छ ।