काठमाडौं। नेपाली राष्ट्रिय क्रिकेट टोलीका मुख्य प्रशिक्षक स्टुअर्ट लले नयाँ कप्तानको नेतृत्वसँगै नेपाली क्रिकेटमा नयाँ युग सुरु भएको बताएका छन्।
शुक्रवार काठमाडौंमा आयोजित नेपाली टोलीको बिदाइ कार्यक्रममा बोल्दै लले नयाँ नेतृत्व र युवा खेलाडीको ऊर्जाले टोलीलाई नयाँ दिशामा अघि बढाउने बताए। मलेसिया भ्रमणका लागि टोलीको तयारी राम्रो रहेको उल्लेख गर्दै उनले त्यहाँको स्पिनमैत्री पिचमा युवा र अनुभवी खेलाडीको सन्तुलनले नेपाली टोलीलाई फाइदा पुग्ने विश्वास व्यक्त गरे।
‘परिवर्तनले सधैं नयाँ युगको सङ्केत गर्छ,’ लले भने, ‘नयाँ कप्तान र ऊर्जावान् खेलाडीको समूहका साथ हामी यो सुरुवातलाई उत्कृष्ट बनाउन चाहन्छौं।’
कप्तान सन्दीप लामिछानेसँगको सहकार्यमा बलियो टोली मैदानमा उतार्ने लक्ष्य रहेको उनले बताए। सन्दीपको क्षमतामाथि विश्वास व्यक्त गर्दै लले राष्ट्रको नेतृत्व गर्ने जिम्मेवारीले उनलाई थप निखार्ने बताए।
नेदरल्यान्ड्स भ्रमणको नतिजा अपेक्षाअनुसार नआए पनि त्यसबाट टोलीले पाठ सिकेको लले बताए। टसको भूमिका र दबाबका बेला सही निर्णय लिन नसक्दा हार व्यहोर्नुपरेको स्वीकार गर्दै उनले कमजोरी सुधार गरेर अघि बढ्नुपर्ने बताए।
‘घरेलु मैदानमा आठमध्ये छ खेल जित्दा कुनै चर्चा भएन, तर चार खेल हार्नेबित्तिकै आलोचना सुरु भयो,’ उनले भने।
५० ओभरको क्रिकेटमा धैर्य र आक्रामकताको सन्तुलन आवश्यक हुने उल्लेख गर्दै लले खेलाडीलाई मैदानमा ‘इन्टेलिजेन्ट’ र ‘एग्रेसिभ’ भएर खेल्न सुझाए। उनका अनुसार एकदिवसीय क्रिकेटमा टेस्टको जस्तो धैर्य र अन्तिम ओभरमा टी–२० को जस्तो आक्रामकता आवश्यक हुन्छ।
मलेसिया भ्रमणपछि नेपाली टोलीले डार्विनमा टी–२० शैलीको तयारीमा समेत सहभागिता जनाउनेछ। फरक वातावरण र खेलशैलीमा हुने तयारीले बलियो राष्ट्रिय टोली निर्माणमा सहयोग पुग्ने लले विश्वास व्यक्त गरे।
