काठमाडौँ । हिमाली भेगमा जारी प्रतिकूल मौसमका कारण डोल्पा जिल्लाका विभिन्न स्थानमा दूरसञ्चार सेवा प्रभावित भएको छ।
दूरसञ्चार कार्यालय डोल्पाका अनुसार मंगलबार रातिदेखि लगातार परेको वर्षा र हिमपातले नेपाल टेलिकमका टावरमा आवश्यक विद्युत् आपूर्ति अवरुद्ध हुँदा मोबाइल तथा अन्य सञ्चार सेवा सञ्चालनमा समस्या आएको हो।
मुड्केचुला गाउँपालिकामा अवस्थित दुई टावर, जगदुल्ला गाउँपालिकाको डाँडामा रहेको टावर तथा त्रिपुरासुन्दरी नगरपालिका-१, त्रिपुराकोटस्थित न्युने डाँडाका टावरमा पावर सप्लाइ बन्द भएको कार्यालयले जनाएको छ।
कार्यालयको विवरणअनुसार ती टावरहरू सौर्य ऊर्जामा निर्भर रहेकाले लामो समयसम्म घाम नलाग्दा सोलार प्रणाली चार्ज हुन नसकेको र त्यसैका कारण सेवा ठप्प भएको हो। हाल टावरमा कुनै प्राविधिक खराबी भने नरहेको जनाइएको छ।
मौसममा सुधार आएपछि सौर्य प्रणाली पुनः सक्रिय भई सेवा स्वाभाविक रूपमा सञ्चालनमा आउने अपेक्षा गरिएको कार्यालयले स्पष्ट पारेको छ। साथै, मौसम अवस्था यथावत् रहेमा काइके गाउँपालिकासहित जिल्लाका अन्य स्थानमा रहेका टावरहरू पनि प्रभावित भई थप क्षेत्र सञ्चार सेवाबाट वञ्चित हुन सक्ने सम्भावना रहेको जानकारी दिइएको छ।
