काठमाडौं। नेकपा (एमाले)का संसदीय दलका नेता रामबहादुर थापा (बादल) ले प्रधानमन्त्री बालेन्द्र साह नेतृत्वको सरकारले छोटो अवधिमै राष्ट्रियता, लोकतन्त्र र जनजीविकामाथि गम्भीर प्रश्न खडा गरेको आरोप लगाएका छन्।
बुधबार प्रतिनिधिसभा बैठकमा बोल्दै थापाले सरकारको विदेश नीति र राष्ट्रिय सुरक्षा रणनीतिमा ‘खतरनाक विचलन’ देखिएको दाबी गरे। उनले तिब्बतीयन आध्यात्मिक संगठन (टीओबी) र पश्चिमी कूटनीतिज्ञलाई दलाई लामाको जन्मोत्सवका नाममा राजनीतिक गतिविधि गर्न सरकारले अनुमति दिएको आरोप लगाए।
थापाले तिब्बती गुम्बाहरूमा ठूलो मात्रामा शक्ति सञ्चय भइरहेको दाबी भइरहेकाले गत भदौमा लुटिएका हतियारसमेत त्यहाँ लुकाइएको हुनसक्ने टिप्पणी हुने गरेको बताए। गत वर्षको २४ भदौदेखि सुरु भएको भनिएको ध्वंसात्मक गतिविधि अझै जारी रहेको दाबीसमेत उनले गरे।
सत्तारूढ राष्ट्रिय स्वतन्त्र पार्टी (रास्वपा)भित्रको आन्तरिक शक्ति संघर्षले मुलुकलाई बहुआयामिक चुनौतीतर्फ धकेल्न सक्ने आशंकासमेत थापाले व्यक्त गरे। उनले प्रधानमन्त्री साहका सीमासम्बन्धी अभिव्यक्तिको पनि आलोचना गरे।
