काठमाडौं । नेपाली कांग्रेसका नियमित महाधिवेशन पक्षधर नेताहरूले पार्टी एकता वा वैकल्पिक संगठन निर्माणबारे अब थप ढिलाइ नगर्न नेतृत्वलाई सुझाव दिएका छन्।
मंगलबार दोस्रो दिन बसेको १४औँ महाधिवेशनबाट निर्वाचित केन्द्रीय समितिको बैठकमा बोल्ने अधिकांश नेताहरूले पार्टीलाई लामो समय अन्योलमा नराखी एकताका लागि ठोस पहल गर्नुपर्ने र त्यो सम्भव नभए वैकल्पिक बाटोबारे शीघ्र निर्णय गर्नुपर्ने सुझाव दिएका हुन् ।
बैठकपछि सञ्चारकर्मीसँग कुरा गर्दै नेता मिनबहादुर विश्वकर्माले बैठकमा पाँच जना नेताले आफ्नो धारणा राखेको र सबैले पार्टी एकताको आवश्यकतामा जोड दिएको जानकारी दिए।
उनका अनुसार अधिकांश वक्ताले पहिलो प्राथमिकता पार्टी एकतालाई दिनुपर्नेमा जोड दिएका छन्। तर, एकता सम्भव नभए नेपाली कांग्रेसको राजनीतिक विरासतलाई निरन्तरता दिने गरी वैकल्पिक शक्ति वा नयाँ संगठन निर्माण गर्न पनि पछि हट्न नहुने मत राखेका छन्।
उनले भने, ‘अधिकांश वक्ताहरूको कुरा नै के छ भने अब अल्मल नगरौँ, जे गर्ने हो छिटो गरौँ भन्ने छ ।’
विश्वकर्माले लोकतान्त्रिक आन्दोलनमा नेपाली कांग्रेसका अग्रज नेताहरूले पुर्याएको योगदानलाई निरन्तरता दिन सबै नेताहरू साझा निर्णयका साथ अघि बढ्नुपर्ने आवश्यकता औँल्याएको बताए।
बैठकले साउन ६ गते मनाइने विपी स्मृति दिवस भव्य रूपमा मनाउने निर्णय पनि गरेको विश्वकर्माले जानकारी दिए। उनका अनुसार बैठकमा राष्ट्रिय तथा अन्तर्राष्ट्रिय राजनीतिक परिस्थितिबारे समेत छलफल भएको थियो।
केन्द्रीय समितिको बैठक बुधबार दिउँसो ३ बजे चुनदेवीस्थित सम्पर्क कार्यालयमा पुनः बस्ने गरी स्थगित गरिएको छ।
