काठमाडौँ, ३ असोज । फिफाको पछिल्लो वरीयतामा नेपाल एक स्थान तल झरेको छ । फिफाले बिहीबार सार्वजनिक गरेको नयाँ वरियतामा नेपाल १७६औँ स्थानमा झरेको हो । यसअघि नेपाल १७५औँ स्थानमा थियो ।
दक्षिण एसियाको शीर्ष स्थानमा रहेको भारत दुई स्थान तल झर्दै १२६औँ स्थानमा पुगेको छ भने दोस्रो स्थानमा रहेको माल्दिभ्स १६३औँ स्थानमा छ । त्यसै गरी दुई स्थान तल झर्दै भुटान १८४औँ स्थानमा छ भने दुई स्थान तल झरेर बङ्गलादेश १८६औँ स्थानमा पुगेको छ । त्यसै गरी पाकिस्तान १९७औँ स्थानमा र पाँच स्थान सुधार गर्दै श्रीलङ्का २००औँ स्थानमा छ ।
फिफा वरीयताको शीर्ष स्थानमा भने अर्जेन्टिना कायमै रहेको छ । फिफा वरियताको शीर्ष १० स्थानमा कुनै परिवर्तन भएको छैन । जसमा दोस्रोमा फ्रान्स, तेस्रोमा स्पेन, चौथोमा ईङल्याण्ड, पाँचौँमा ब्राजिल, छैटौँमा बेल्जियम, सातौँमा नेदरल्याण्डस, आठौँमा पोर्चुगल, नवौँमा कोलम्बिया र दशौँमा इटाली रहेका छन् । एसियाबाट जापानले २ स्थान सुधार गर्दै १६औँ स्थानमा उक्लिएको छ ।
