रुपन्देहीको तिलोत्तमा नगरपालिका-६ मा एक युवती मृत फेला परेकी छन् । मृत्यु हुनेमा पश्चिम नवलपरासीको सुनवल-२ की अस्मिता पटवार शर्मा हुन् ।
शनिबारबाट हराएकी युवतीको मृत शरिर आइतबार बिहान तिलोत्तमा-६, तिनाउखोलामा फेला परेको थियो । उनलाई दाउरा खोज्न गएका महिलाहरूले खोला किनारामा भेटेका थिए ।
यहीँ वैशाख २६ गते शर्मा थरका युवकसँग मागी विवाह गरेर तिलोत्तमा आएकी युवती सासुसँग पार्लर जाने भनेर निस्किएको छिमेकीहरूले बताएका छन् । लामो समयसम्म पनि घर नआएपछि घरकाले माइतीपक्षलाई फोन गरेर बोलाएका थिए ।
युवतीको बुवा शनिबार नै छोरीको घर आएर ईलाका प्रहरी कार्यालय बुटवलमा छोरी हराएको जाहेरीसमेत दिएका थिए । उनले भने, ‘राति २ छोरालाई पठाएँ, उनीहरुले पनि नभेटेपछि चिन्ता लाग्न थाल्यो ।’ पछि छोरीको घरकाले नै शव भेटिएको भनेर जानकारी दिए ।’
उनीहरु आइपुग्दा शव लुम्बिनी प्रादेशिक अस्पतालमा पोस्टमार्टमका लागि पुर्याइएको थियो । मृतक अस्मिताका श्रीमान् कामका सिलसिलामा भारत गएका छन् । युवतीको टाउको र शरीरमा चोट रहेको पोष्टमार्टमा संलग्न एक डाक्टरले बताए । शरिरका बिभिन्न अंगमा चोट देखिएपछि उनको बलात्कार पछि हत्या हुन सक्ने आंशका गरिएको छ । पोष्टमार्टम रिपोर्ट आएपछि सबै कुरा खुल्ने ती चिकित्सकले बताए ।
नोट: यसअगाडी असान्दर्भिक तस्विर परेको हुनाले उक्त तस्विरलाई सच्चाइएको छ । सम्पादक