इङ्ग्ल्यान्डको सर्वाधिक सफल क्लब म्यानचेस्टर युनाइटेडका स्टार फरवार्ड मासन ग्रिनउडमाथि उनकी प्रेमिकाले बलात्कार र कुटपिट गरेको आरोप लगाइन् । अघिल्लो महिना सामाजिक सञ्जालमार्फत ह्यारिट रोब्सन नाम गरेकी ग्रिनउडकी प्रेमिकाले बलात्कारपछि कुटपिट भएको भन्दै रक्ताम्य फोटो पोस्ट गर्दै उनलाई आरोप लगाइन् ।
उमेरमा ग्रिनउड र आफ्नी प्रेमिकाभन्दा कान्छा थिए । इङ्ग्ल्यान्डका फरवार्ड २० र रोब्सन २१ वर्षकी थिइन् । एउटै विद्यालय पढ्ने गरेका उनीहरूको प्रेम–सम्बन्ध भने २०१९ देखि सुरु भएको थियो । तर २०२२ को सुरुआततिर भने रोब्सनले ग्रिनउडलाई आफूमाथि बलात्कार र आक्रमण गरेको आरोप लगाएकी थिइन् ।
सामाजिक सञ्जाल इस्टाग्रामको स्टोरीमा उनले आफू आघात भएका तस्बिरहरू र भिडियो सार्वजनिक गरेकी थिइन्, जसमध्ये एक तस्बिरमा उनको ओठबाट रगत बगिरहेका देखिन्थ्यो । भिडियोको क्यापसनमा उनले ‘ग्रिनउडले ममाथि के गरेको हो भन्ने जान्न चाहनेहरूका लागि..’ भनेर लेखेकी थिइन् ।
शरीरका विभिन्न भागमा देखिएका निल डामसहितको तस्बिर रोब्सनले सार्वजनिक गरेपछि प्रहरीले अनुसन्धान थालेको थियो । प्रहरीले अनुसन्धान थालेसँगै युनाइटेडले उनलाई प्रशिक्षण र खेलमा निलम्बन गरेको थियो । त्यतिमात्र नभएर उनका सहकर्मी तथा स्टार खेलाडी क्रिस्टियानो रोनाल्डो, पल पोग्बा र डेभिड डी गेयाले विरोधस्वरूप सामाजिक सञ्जालमा अनफलो गरेका थिए ।
टोलीबाट निलम्बित भएसँगै प्रहरीलाई अनुसन्धानमा सहज भएको थियो । त्यसबाहेक विश्वचर्चित ब्रान्ड ‘नाइक’ र इए स्पोर्ट्सले उनीसँग तत्काल व्यापारिक सम्बन्ध तोडेका थिए ।
पछि उनी ७२ घण्टा हिरासतमा रहेर जमानतमा रिहा भए । तर अझै पनि युनाइटेडले उनलाई खेलाएको छैन । किनकि, हालसम्म उनीमाथि प्रहरीले अनुसन्धान गरिरहेको छ । हिरासतमा राखेर प्रहरीले अनुसन्धान गरिरहँदा र रिहा भएपछि उनको पक्षमा कोही बोलेका छैनन् ।
छन त उनका पनि सामाजिक सञ्जालमा थुप्रै फलोअर्स थिए । फुटबलमा उत्कृष्ट प्रदर्शन गरी धेरै समर्थक बटुल्न सफल भएका थिए उनी । तर पनि इङ्ग्ल्यान्डका फ्यानहरू सडकमा उत्रिएनन् । ‘जस्टिस फर मासन ग्रिनउड’ भनेनन् । त्यहाँका जनता र उनकै समर्थक पनि जे गर्छ कानुनले गर्छ भनेर भन्दै सबैले कानुनको सम्मान गर्नतिर लागे । कोही पनि आफैँ न्यायाधीश बन्न खोजेनन् । यो शिक्षित र असल नागरिकको वास्तविक पहिचान भनेको यही हो ।
नेपालमा भने नाबालिगमाथि बलात्कार र यौन शोषण गरेको आरोपमा नायक पल शाह प्रहरी हिरासतमा छन् । १७ वर्षीया किशोरीलाई जबरजस्ती करणी तथा यौन दुर्व्यवहार गरेको आरोप लागेका शाह अहिले जिल्ला प्रहरी कार्यालय, तनहुँको हिरासतमा छन् । पीडित किशोरीका बुबाले दिएको जाहेरीका आधारमा नेपाल प्रहरीले पक्राउ पूर्जी जारी गरेपछि आइतबार आत्मसमर्पण गरेका पलमाथि प्रहरीले सात दिन म्याद थपेर अनुसन्धान गरिरहेको छ ।
तर हामी भने अनुसन्धानलाई नै प्रभावित तुल्याउने गरी दिन रात ‘जसिटस फर पल’ भन्दै नारा लगाएर हिँडेको छौँ । सामाजिक सञ्जालमा पीडित बालिकाविरुद्ध नै बोलिरहेका छौँ । आफ्नो फिल्म चलाउनलाई पललाई निर्दोष दाबी गरिरहेका छौँ । पललाई फसाइयो नि ! भनेर रोइरहेका छौँ । हुन त जो यसरी पलको पक्ष लिएर छाती आफ्नो छाती पिटिरहेका छन् । ती नेपालको कानुनबारे अनभिज्ञ छन् ।
बलात्कारबारे नेपालको कानुन कडा
बलात्कारसम्बन्धी कानुन अरू देशमा भन्दा नेपालमा कडा भएको प्रहरी प्रधान कार्यालयका प्रवक्ता एसएसपी विष्णुकुमार केसी बताउँछन् । नेपालको संविधानमा फाँसीको व्यवस्था नभए पनि कानुन कडा रहेको र बलात्कारमा संलग्न प्रहरीबाट बच्न नसक्ने उनको भनाइ छ ।
बलात्कारका घटनामा संलग्न रहेकालाई नेपाल प्रहरीले पक्राउ गरी कानुनी कारबाहीमा ल्याउन सफल भइरहेको उल्लेख गर्दै उनले केटिएम दैनिकसँग भने, ‘अन्य देशको तुलनामा नेपालको कानुन कडा छ । होे, हाम्रो संविधानमा फाँसीको व्यवस्था छैन । तर कानुनी कारबाहीमा ल्याउन नेपाल प्रहरीले प्रभावकारी काम गरिरहेको छ । यसकारण घटना सतहमा आउँदै छन् ।’
पलमाथि आरोप प्रमाणित भए के हुन्छ ?
मुलुकी अपराध संहिता २०७४ को परिच्छेद १८ मा करणीसम्बन्धी कसुरमा पीडितको उमेरअनुसार फरक–फरक सजायको व्यवस्था छ । संहितामा पीडित १६ वर्षदेखि १८ वर्षसम्मका महिला भए १० वर्षदेखि १२ वर्षसम्मको कैद सजायको व्यवस्था गरिएको छ । पीडित १८ वर्ष वा १८ वर्षभन्दा बढी उमेरका महिला भएको खण्डमा भने सात वर्षदेखि १० वर्षसम्म सजायको व्यवस्था छ ।
