नेपाल पत्रकार महासंघको भोलि हुन गइरहेको २६ औँ महाधिवेशनमा उम्मेदवारी दिएका ११ जनालाई नेपाल प्रेस युनियनले कारबाही गरेको छ ।
युनियनको अनुशासन समितिका वरिष्ठ उपाध्यक्ष तथा संयोजक दीपक आचार्यले आज एक प्रेस विज्ञप्ति जारी गरी उनीहरूलाई उम्मेदवारी फिर्ता लिन विभिन्न चरणमा विभिन्न तहबाट गरिएको आग्रहको पालना नगरेको पाइएकाले कारबाही गरेको जनाएका छन् ।
युनियनको विधानको धारा २० को (ड) को व्यवस्था अनुरूप अनुशासन समितिको आकस्मिक बैठकले कम्तीमा ६ वर्षसम्मका लागि साधारण सदस्यता समेतबाट निष्कासन गरिएको बताइएको छ ।
कारबाहीमा पर्नेमा नेपाल पत्रकार महासंघको केन्द्रीय उपाध्यक्ष (समावेशी) पदमा उम्मेदवारी दिएका अवधेश झा, महासचिव पदमा उम्मेदवारी दिएका सुबोध गौतम, सचिव (खुल्ला) पदमा उम्मेदवारी दिएका यमप्रसाद विरही (यम विरही), कोषाध्यक्ष पदमा उम्मेदवारी दिएका माधव दुलाल, लेखा समिति संयोजक पदमा उम्मेदवारी दिएका लक्ष्मण कार्की छन् ।
त्यस्तै कारबाहीमा पर्नेमा प्रतिष्ठान शाखाबाट केन्द्रीय सदस्यमा उम्मेदवारी दिएका देवबहादुर कुँवर, अपाङ्गता कोटाबाट केन्द्रीय सदस्यमा उम्मेदवारी दिएका रविन थपलिया, केन्द्रीय सदस्य (खुल्ला) मा उम्मेदवारी दिएका भूपेन्द्र आचार्य, मधेसी कोटाबाट केन्द्रीय सदस्यमा उम्मेदवारी दिएका बिरेन्द्र केएम र राकेशकुमार मिश्र त्यस्तै कर्णाली प्रदेशबाट केन्द्रीय सदस्यमा उम्मेदवारी दिएका नन्दबहादुर ऐरी छन् ।
नेपाल प्रेस युनियनले जारी गरेको विज्ञप्तिमा प्रदेश तथा शाखामा समेत नेपाल प्रेस युनियन तथा गठबन्धनका आधिकारिक उम्मेदवार विरुद्ध उम्मेदवारी दिनेका हकमा कम्तीमा ६ वर्ष साधारण सदस्यबाट निष्कासन गरी सङ्गठन समितिलाई सदस्यता सूचीबाट नाम हटाउन जानकारी गराइएको जनाइएको छ।