नेपाल पत्रकार महासंघको २६ औं महाधिवेशनमा स्वतन्त्र रुपमा अध्यक्ष पदमा उठेका गजेन्द्र बुढाथोकीले आफ्नो चुनावी खर्च सार्वजनिक गरेका छन् ।
उनले शुक्रबार चुनावको लागि भएको आम्दानी र खर्च विवरण सार्वजनिक गरेका छन् । पछिल्लो समयमा चुनाव महङ्गो हुँदै गइरहेको गुनासो आउन थालेको छ ।
बुढाथोकीले जस्तै जिल्ला र प्रदेशका केही उम्मेदवारहरुले पनि आफ्नो चुनावी खर्च सार्वजनिक गर्न थालेका छन् ।
यस्तो छ बुढाथोकीको आम्दानी र खर्च विवरण
बुढाथोकीले नेपाल पत्रकार महासंघको अध्यक्षमा उम्मेदवारी दिँदा साथीहरुले रु १ सय रुपैयाँका दरले दिएको रकम ४२ हजार रुपैयाँ प्राप्त भएको उल्लेख गरेका छन् । उम्मेदवारी शुल्कका लागि १० हजार रुपैयाँ खर्च भएको जनाएका छन् । ट्याक्सी भाडा र स्टेशनरी लगायतमा ३६ हजार ४ सय खर्च भएको जानकारी दिएका छन् ।
उनले सामाजिक सञ्जाल फेसबुकमा लेखेका छन्– ‘जतिसुकै किफायती गर्दा पनि मेरो शारीरिक अवस्थाका कारण ट्याक्सी रिजर्भमा लिनुपर्दा भाडा, डाइपर, स्टेशनरी, खाजारपानी तथा सञ्चार गरि कुल खर्च ३६४०० भएको छ, बचेको पैसा रु ५ हजार ८ सय रहेको छ । यसपूर्व मैले गरेको प्रतिबद्धताअनुसार बचेको रकममा केही आफ्नातर्फबाट थपेर स्पाइनल इन्जरी नेटवर्कमा रहेका १५ जना स्पाइनल इन्जरी भएका बच्चाहरुको किताब कापीका लागि १५ हजार रुपैयाँ दिँदैछु ।’
राजनीतिक दल निकट पत्रकार संगठनका प्यानलबाट उठेका उमेदवारविरुद्ध पत्रकार बुढाथोकीले अध्यक्ष पदमा स्वतन्त्र उम्मेदवारी दिएका थिए ।