काठमाडौं । नेपाली कांग्रेसका सभापति गगनकुमार थापाले आगामी स्थानीय तह र प्रदेश तहको निर्वाचन निष्पक्ष रूपमा सम्पन्न गर्ने मुख्य जिम्मेवारी सरकारकै भएको बताएका छन् । उनले राजनीतिक दल र प्रतिपक्षलाई बेवास्ता गरेर अघि बढ्ने सरकारको कार्यशैली निर्वाचनका सन्दर्भमा स्वीकार्य नहुने बताए ।
राष्ट्रिय मान्यता प्राप्त राजनीतिक दलका शीर्ष नेताहरूसँग निर्वाचन आयोगले गरेको छलफलपछि सञ्चारकर्मीसँग कुरा गर्दै थापाले निर्वाचनको वातावरण बनाउन सरकारले नै समयमै पहलकदमी लिनुपर्ने बताए । आयोगले मात्र सबै जिम्मेवारी लिनुभन्दा यस विषयमा सरकारको ध्यानाकर्षण गराउनुपर्ने उनको धारणा थियो ।
उनले सरकारले अन्य राजनीतिक दलसँग संवाद गर्न नचाहेको भन्दै असन्तुष्टि जनाए । गत वर्ष भदौ २३ र २४ गतेका घटनापछिको परिस्थितिमा निर्वाचन सम्पन्न गर्न तत्कालीन सरकारले राजनीतिक दलहरूसँग गरेको संवाद र सहजीकरण महत्त्वपूर्ण रहेको उनले स्मरण गराए ।
‘निर्वाचनको निष्पक्षता सुनिश्चित गर्ने कुरामा सबैभन्दा ठूलो जिम्मेवारी सरकारको हो,’ थापाले भने, ‘सरकारले अरू विषयमा कुनै पनि राजनीतिक दल र प्रतिपक्षलाई चिन्दिनँ, गन्दिनँ भन्दा काम चल्न सक्छ, तर निर्वाचनमा चल्दैन ।’
थापाले निर्वाचनको मिति र प्रक्रियाबारे संविधान र कानुनमा स्पष्ट व्यवस्था रहेकाले सोहीअनुसार अघि बढ्नुपर्ने बताए । स्थानीय र प्रदेश तहको निर्वाचन एकैपटक गर्ने विषयमा आयोगमा छलफल भएको उल्लेख गर्दै उनले विशिष्ट परिस्थितिमा दुवै तहको निर्वाचन एउटै मितिमा गर्न सकिने विषयमा राजनीतिक दलहरूबीच थप छलफल आवश्यक रहेको बताए ।